اسلام آباد: چیئرمین کیپٹل ڈویلپمنٹ اتھارٹی (سی ڈی اے) نے کشمیر چوک کا دورہ کیا اور جاری ترقیاتی منصوبے پر تازہ ترین پیش رفت کا جائزہ لینے کے ساتھ ساتھ دارالحکومت کے ایک اہم اور مصروف ٹریفک جنکشن پر ٹریفک کی روانی بہتر بنانے اور ٹریفک کے دباؤ اور رش کو کم کرنے کے لیے کیے جانے والے اقدامات کا بھی جائزہ لیا۔
دورے کے دوران چیئرمین سی ڈی اے نے کشمیر چوک انڈر پاس منصوبے پر ہونے والی تازہ ترین پیش رفت کا جائزہ لیا۔ اس موقع پر ڈی جی انفراسٹرکچر نے چیئرمین سی ڈی اے کو منصوبے پر اب تک ہونے والی پیش رفت، جاری کام، منصوبے کی مقررہ مدت اور بروقت تکمیل کے لیے کیے جانے والے اقدامات کے حوالے سے تفصیلی بریفنگ دی۔
چیئرمین سی ڈی اے نے کہا کہ کشمیر چوک منصوبہ ٹریفک کی روانی کو بہتر بنانے اور شہریوں کو طویل مدتی ریلیف فراہم کرنے کے حوالے سے انتہائی اہمیت کا حامل ہے۔ انڈر پاس کی تعمیر کا مقصد گاڑیوں کی آمدورفت کو مزید ہموار بنانا، ٹریفک کے انتظار اور تاخیر میں کمی لانا اور بالخصوص رش کے اوقات میں کشمیر چوک پر ٹریفک کے دباؤ کو کم کرنا ہے۔
چیئرمین سی ڈی اے نے کشمیر چوک اور ملحقہ شاہراہوں پر موجودہ ٹریفک صورتحال کا بھی جائزہ لیا اور سی ڈی اے کی جانب سے کیے جانے والے فوری ٹریفک مینجمنٹ اقدامات کا معائنہ کیا۔ انہوں نے متعلقہ شعبوں کو ہدایت کی کہ مستقل انفراسٹرکچر کی تکمیل تک عارضی اور قلیل مدتی ٹریفک مینجمنٹ انتظامات کو مؤثر رکھا جائے تاکہ شہریوں اور مسافروں کو آمدورفت کے دوران کسی قسم کی دشواری کا سامنا نہ کرنا پڑے۔
چیئرمین سی ڈی اے کو کشمیر چوک، مری روڈ پر ٹریفک مینجمنٹ سلوشن کے حوالے سے بھی بریفنگ دی گئی، جس کا مقصد ٹریفک کی روانی کو بہتر بنانا اور موجودہ ٹریفک رکاوٹوں اور بوتل نیکس کو دور کرنا ہے۔ چیئرمین سی ڈی اے نے ہدایت کی کہ تمام ضروری اقدامات باہمی رابطے اور مربوط حکمت عملی کے تحت کیے جائیں تاکہ ترقیاتی کاموں کے دوران شہریوں کو کم سے کم مشکلات کا سامنا ہو اور ٹریفک کی روانی بلا تعطل جاری رہے۔
یہ تمام اقدامات سی ڈی اے کی اس وسیع تر حکمت عملی کا حصہ ہیں جس کے تحت اسلام آباد میں مربوط، مؤثر اور جدید روڈ نیٹ ورک کو فروغ دیا جا رہا ہے، تاکہ شہر کی ترقی کے ساتھ ساتھ ٹریفک کی روانی بہتر بنائی جا سکے اور شہریوں کو آمدورفت کے لیے بہترین سہولیات فراہم کی جا سکیں۔
چیئرمین سی ڈی اے نے متعلقہ افسران کو تمام ترقیاتی منصوبوں پر کام مزید تیز کرنے اور انہیں مقررہ مدت کے اندر مکمل کرنے کی ہدایت کی۔ انہوں نے واضح کیا کہ تمام ترقیاتی کام اعلیٰ معیار، انجینئرنگ کے اصولوں اور حفاظتی تقاضوں کے مطابق مکمل کیے جائیں، جبکہ ٹریفک اور شہریوں کی روزمرہ زندگی میں کم سے کم خلل کو یقینی بنایا جائے۔
انہوں نے مزید ہدایت کی کہ انفراسٹرکچر کی ترقی سے متعلق تمام اقدامات تمام متعلقہ اداروں اور شعبوں کے ساتھ قریبی رابطے اور باہمی تعاون سے مکمل کیے جائیں۔ انہوں نے کہا کہ رش کے اوقات میں ٹریفک مینجمنٹ، ضرورت کے مطابق سڑکوں کی بہتری، لین منیجمنٹ اور اہم شاہراہوں کے درمیان رابطے کو خصوصی اہمیت دی جائے۔
چیئرمین سی ڈی اے نے متعلقہ پراجیکٹ ڈائریکٹرز اور فیلڈ افسران کو منصوبے کے مقام پر باقاعدگی سے معائنہ کرنے اور کام کی رفتار اور معیار کی مؤثر نگرانی یقینی بنانے کی ہدایت کی۔ انہوں نے ہدایت کی کہ منصوبے پر عملدرآمد میں حائل کسی بھی مسئلے یا رکاوٹ کی فوری نشاندہی کی جائے اور باہمی رابطے اور مربوط کوششوں کے ذریعے اسے بروقت حل کیا جائے۔
چیئرمین سی ڈی اے نے اس عزم کا اعادہ کیا کہ عوامی سہولت، بہتر سفری و آمدورفت کی سہولیات، جدید انفراسٹرکچر کی ترقی اور مؤثر ٹریفک مینجمنٹ سی ڈی اے کی اہم ترجیحات میں شامل ہیں۔ انہوں نے کہا کہ سی ڈی اے اسلام آباد کو پاکستان کا ایک ترقی یافتہ، صاف ستھرا، سرسبز، محفوظ اور خوبصورت دارالحکومت بنانے کے لیے پرعزم ہے۔
انہوں نے کہا کہ اسلام آباد میں انفراسٹرکچر کی بہتری، ٹریفک کے مسائل کے حل اور شہریوں کو بہتر سفری سہولیات کی فراہمی کے لیے انڈر پاسز، پلوں، سڑکوں اور دیگر اہم ترقیاتی منصوبوں پر کام تیزی سے جاری ہے۔ ان منصوبوں سے نہ صرف شہریوں کو بہتر آمدورفت کی سہولیات میسر آئیں گی بلکہ دارالحکومت میں تجارتی اور معاشی سرگرمیوں کے فروغ میں بھی مدد ملے گی۔
اس موقع پر شہریوں اور بالخصوص کشمیر چوک سے روزانہ گزرنے والے مسافروں نے سی ڈی اے کی جانب سے ٹریفک کے مسائل کے حل اور جدید انفراسٹرکچر کی فراہمی کے لیے کیے جانے والے اقدامات کو سراہا۔ شہریوں نے کشمیر چوک انڈر پاس سمیت سڑکوں، پلوں اور دیگر ترقیاتی منصوبوں کو عوامی سہولت اور ٹریفک کی روانی میں بہتری کے لیے اہم قرار دیتے ہوئے سی ڈی اے کی کوششوں کو سراہا اور توقع ظاہر کی کہ ان منصوبوں کی بروقت تکمیل سے شہریوں کو طویل مدتی ریلیف حاصل ہوگا۔
چیئرمین سی ڈی اے نے شہریوں کی جانب سے اظہارِ اعتماد اور حوصلہ افزائی کو سراہتے ہوئے کہا کہ سی ڈی اے شہریوں کو بہتر سہولیات کی فراہمی اور ان کے مسائل کے مؤثر حل کے لیے تمام دستیاب وسائل بروئے کار لا رہا ہے۔ انہوں نے کہا کہ شہریوں کی سہولت اور شہر کی مجموعی ترقی کو مدنظر رکھتے ہوئے جدید انفراسٹرکچر کی فراہمی اور ترقیاتی منصوبوں کی بروقت تکمیل کا سلسلہ مزید تیز کیا جائے گا۔
