بلوچستان،دہشتگردوں کی جانب سے بارودی گاڑی کی تیاری کے دوران دھماکا، 8دہشتگرد ہلاک، 3 شہری جاں بحق

سوراب (سب نیوز)بلوچستان کے ضلع سوراب میں فتن الہندوستان سے وابستہ دہشتگردوں کی جانب سے بارودی گاڑی تیار کرنے کے دوران قبل از وقت دھماکا ہوگیا، جس کے نتیجے میں 8 دہشتگرد ہلاک اور متعدد زخمی ہوگئے۔
پاک فوج کے شعبہ تعلقات عامہ (آئی ایس پی آر)کے مطابق 12 اگست 2026 کی صبح دہشت گرد بارودی گاڑی تیار کر رہے تھے کہ اسی دوران دھماکا ہوگیا۔ قبل از وقت دھماکے کے نتیجے میں 8 دہشت گرد ہلاک جبکہ متعدد زخمی ہوئے۔آئی ایس پی آر کے مطابق دھماکے اور دہشتگردوں کی جانب سے وہاں ذخیرہ کیے گئے دیگر دھماکا خیز مواد کے پھٹنے کے باعث قریب موجود 3 شہری بھی جاں بحق ہوگئے۔
آئی ایس پی آر کے مطابق واقعے کے فوری بعد سیکیورٹی فورسز اور بلوچستان پولیس جائے وقوعہ پر پہنچ گئیں اور دہشتگردوں اور ان کے سہولت کاروں کا سراغ لگانے کے لیے جامع مشترکہ کلیئرنس آپریشن شروع کیا۔آپریشن کے دوران سیکیورٹی فورسز نے فرار ہونے والے دہشتگردوں کی نقل و حرکت کا بروقت سراغ لگایا اور موثر کارروائی کرتے ہوئے مزید 10 دہشت گردوں کو ہلاک کردیا۔
آئی ایس پی آر کے مطابق ان واقعات میں اب تک فتن الہندوستان سے وابستہ مجموعی طور پر 18 دہشت گرد ہلاک کیے جا چکے ہیں۔ترجمان پاک فوج کے مطابق دہشتگردوں کے ساتھ شدید فائرنگ کے تبادلے کے دوران پاک فوج کے 2 بہادر جوان بھی زخمی ہوئے۔آئی ایس پی آر کا کہنا ہے کہ علاقے میں کلیئرنس اور سینیٹائزیشن آپریشن جاری ہے تاکہ باقی ماندہ دہشت گردوں کا بھی خاتمہ کیا جا سکے۔
آئی ایس پی آر کے مطابق نیشنل ایکشن پلان کے تحت وفاقی ایپکس کمیٹی کی منظوری سے عزمِ استحکام کے وژن کے تحت سیکیورٹی فورسز اور قانون نافذ کرنے والے اداروں کی دہشتگردی کے خلاف مسلسل کارروائیاں پوری رفتار سے جاری رہیں گی۔پاک فوج کے شعبہ تعلقات عامہ نے کہا کہ ملک سے غیر ملکی سرپرستی اور حمایت یافتہ دہشت گردی کے ناسور کے مکمل خاتمے تک کارروائیاں جاری رکھی جائیں گی۔