کابل(سب نیوز)کابل میں پاکستانی سفارتخانے میں آپریشن بنیان مرصوص کی پہلی برسی کے موقع پر، سفیر عبید الرحمن نظامانی نے کسی بھی جارحیت کے خلاف اپنے دفاع کے لیے قوم کے عزم کا اعادہ کرتے ہوئے کہا کہ پاکستانی افواج نے دشمن کی ہر جارحیت کا منہ توڑ جواب دیاہے ۔
مسلح افواج کو شاندار خراج تحسین پیش کرتے ہوئے سفیر نظامانی نے کہا کہ قوم ان کی قربانیوں کی ہمیشہ مقروض رہے گی۔پاکستان کی خطے میں قیام امن کی خواہش کا تجزیہ کرتے ہوئے سفیر نظامانی نے متنبہ کیا کہ قیام امن کی خواہش کو کمزوری کی علامت نہ سمجھا جائے۔ سفیر نظامانی نے خطے میں ابھرتے ہوئے خطرات کے خلاف چوکس رہنے کی نشاندہی کی ۔ انہوں نے مغربی بنگال میں بی جے پی کی حالیہ کامیابی کا حوالہ دیا جس کے نتیجے میں مغربی بنگال کے مسلمانوں کے خلاف منظم تشدد کو فروغ دیا جا رہا ہے۔ انہوں نے مزید کہا کہ ایسے شورش زدہ دور میں، قوم کی مسلح افواج کے لیے بھرپور اور واضح حمایت قومی سلامتی کے لیے ناگزیر ہے۔
سفیر نظامانی نے کشمیری مسلمانوں کے غیر متزلزل حوصلے کو سلام پیش کرتے ہوئے کہا کہ قوم اقوام متحدہ کی قرار دادوں کے تحت کشمیریوں کے حق خودارادیت کی اخلاقی ، سیاسی اور سفارتی جدوجہد کی حمایت کرتی رہے گی۔ سفیر نظامانی نے پاک افغان برادرانہ تعلقات کے قیام کے لیے پاکستان کی کوششوں کا ذکر کیا اور افغان حکومت پر زور دیا کہ وہ اپنی سرزمین سے پیدا ہونے والے دہشت گردی کے خطرات کے خلاف ٹھوس کارروائی کرے۔ امریکہ ایران کشیدگی کو کم کرنے میں پاکستان کے سفارتی کردار کو اجاگر کرتے ہوئے سفیر نے کہا کہ اس طرح کے اقدامات عالمی امن کے لیے پاکستان کی مخلصانہ خواہش کی عکاسی کرتے ہیں۔اس موقع پر صدر آصف علی زرداری، وزیراعظم محمد شہباز شریف، نائب وزیراعظم/وزیر خارجہ سینیٹر محمد اسحاق ڈارکے پیغامات پڑھ کر سنائے گئے اور آپریشن بنیان مرصوص پر خصوصی دستاویزی فلم بھی دکھائی گئی۔
