اسلام آباد(سب نیوز)چیئرمین کیپیٹل ڈویلپمنٹ اتھارٹی (سی ڈی اے)و چیف کمشنر اسلام آباد محمد علی رندھاوا نے پیر کے روز سیکٹر ایچ نائن میں قائم رمضان سہولت بازار کا دورہ کیا۔ اس موقع پر سی ڈی اے کے ممبر ایڈمن طلعت محمود، ڈپٹی کمشنر(ڈی سی)اسلام آباد عرفان نواز میمن، سی او ایم سی آئی ڈاکٹر انعم فاطمہ سمیت متعلقہ افسران بھی انکے ہمراہ تھے۔
چیئرمین سی ڈی اے و چیف کمشنر محمد علی رندھاوا نے اشیا خوردونوش کی ارزاں نرخوں پر فراہمی اور کوالٹی کا جائزہ لیا اور مختلف اشیا خوردونوش کے سٹاک کا بھی تفصیلی معائنہ کیا۔چیئرمین سی ڈی اے و چیف کمشنر اسلام آباد نے ایچ نائن رمضان سہولت بازار میں آنے والے صارفین سے اشیا خوردونوش کی قیمتوں اور کوالٹی کے بارے میں دریافت کیا۔ رمضان سہولت بازار میں آنے والے صارفین کا اشیا خوردونوش کی فراہمی، کوالٹی اور انتظامات پر اطمینان کا اظہار کیا۔متعلقہ افسران نے چیئرمین سی ڈی اے و چیف کمشنر اسلام آباد محمد علی رندھاوا کو رمضان سہولت بازاروں میں کئے گئے انتظامات کے حوالے سے بریفنگ دیتے ہوئے بتایا کہ شہریوں کی سہولیات کو مدنظر رکھتے ہوئے شہر بھر میں سات مختلف مقامات پر رمضان سستے بازاروں کا انعقاد کیا گیا ہے۔ بریفنگ دیتے ہوئے بتایا گیا کہ ماہ صیام میں اسلام آباد کے رمضان سہولت بازاروں میں اشیا خوردونوش سرکاری نرخوں پر دستیاب ہیں اور اشیا خوردونوش کے سرکاری نرخوں پر عملدرآمد کیلئے روزانہ کی بنیاد پر مسلسل مانیٹرنگ بھی کی جارہی ہے۔
چیئرمین سی ڈی اے و چیف کمشنر اسلام آباد کو بتایا گیا کہ رمضان المبارک میں شہریوں کو ہرممکن ریلیف فراہم کرنے کیلئے سی ڈی اے و ضلعی انتظامیہ مکمل طور پر متحرک ہے ۔ اس ماہ صیام میں منافع خوروں اور ذخیرہ اندوزوں کیخلاف سخت کارروائیاں عمل میں لائی جارہی ہیں۔ بریفنگ دیتے ہوئے انہیں بتایا گیا کہ وزیراعظم پاکستان شہباز شریف اور وفاقی وزیر داخلہ محسن نقوی کے وژن کے عین مطابق رمضان سہولت بازاروں میں کیش لیس نظام کو مکمل طور پر نافذ العمل کیا گیا ہے۔چیئرمین سی ڈی اے و چیف کمشنر اسلام آباد محمد علی رندھاوا نے ہدایت کی کہ اسسٹنٹ کمشنرز اور پرائس کنٹرول مجسٹریٹ اشیا خوردونوش کی فراہمی اور سرکاری قیمتوں پر دستیابی کو یقینی بنائیں۔ اس سلسلے میں متعلقہ افسران سہولت بازاروں اور منڈیوں میں اپنی موجودگی کو یقینی بنانے کیساتھ شکایات کا فوری ازالہ کریں۔
چیف کمشنر اسلام آباد و چیئرمین سی ڈی اے نے کہا کہ سستے بازاروں میں سرکاری قیمتوں کی ریٹ لسٹ نمایاں جگہوں پر آویزاں کی جائے۔ انہوں نے ہدایت کی کہ صارفین کی سہولیات کو مدِنظر رکھتے ہوئے ہلپ لائن نمبرز اور واٹس نمبر نمایاں جگہوں پر آویزاں کئے جائیں۔چیئرمین سی ڈی اے نے کہا کہ رمضان سہولت بازاروں میں صفائی ستھرائی، سیکورٹی اور پارکنگ کے مثر نظام کیلئے تمام متعلقہ ادارے موثر کوآرڈینیشن کو یقینی بنائیں۔ انہوں نے کہا کہ سرکاری قیمتوں سے زائد وصول کرنے اور ناجائز منافع خوری کرنے والوں کیخلاف سخت کارروائی عمل میں لائی جائے۔ انہوں نے مزید کہا کہ ان اقدامات کا مقصد وفاقی دارالحکومت کے شہریوں کو ماہ صیام میں بہتر سے بہترین سہولیات کی فراہمی کو یقینی بنانا ہے۔
