اسلام آباد: (سب نیوز) نائب وزیرِاعظم و وزیرِ خارجہ سینیٹر محمد اسحاق ڈار نے آج مصر کے وزیرِ خارجہ ڈاکٹر بدر عبدالعاطی سے ٹیلی فون پر رابطہ کیا اور دوطرفہ تعلقات سمیت اہم علاقائی و عالمی امور پر تبادلۂ خیال کیا۔
ترجمان دفترِ خارجہ کے مطابق نائب وزیرِاعظم نے حالیہ کابینہ رد و بدل کے بعد ڈاکٹر بدر عبدالعاطی کو اپنے عہدے پر برقرار رہنے پر مبارکباد دی اور ان کے لیے نیک تمناؤں کا اظہار کیا۔
گفتگو کے دوران دونوں رہنماؤں نے پاکستان اور مصر کے مابین دوستانہ تعلقات کو مزید مضبوط بنانے کے عزم کا اعادہ کیا۔ اس موقع پر باہمی دلچسپی کے علاقائی اور بین الاقوامی امور پر بھی تفصیلی تبادلۂ خیال کیا گیا۔
