اسلام آباد (آئی پی ایس) وزیراعظم شہباز شریف کے بیرون ملک دورے کے پروگرام میں اہم تبدیلی کر دی گئی ہے۔ ذرائع کے مطابق وزیراعظم اب جرمنی کا دورہ نہیں کریں گے اور میونخ سکیورٹی کانفرنس میں شرکت کا پروگرام منسوخ کر دیا گیا ہے۔
ذرائع کا کہنا ہے کہ وزیراعظم نے 12 سے 15 فروری تک میونخ میں سکیورٹی کانفرنس میں شرکت کرنا تھی، تاہم اب وہ صرف آسٹریا کے دارالحکومت ویانا جائیں گے۔ وزیراعظم کا دورۂ آسٹریا دو طرفہ نوعیت کا ہوگا، جہاں وہ 15 اور 16 فروری کو آسٹرین قیادت سے ملاقاتیں اور اہم امور پر تبادلۂ خیال کریں گے۔
ذرائع کے مطابق وزیراعظم شہباز شریف ویانا سے نجی دورے پر دو روز کے لیے لندن روانہ ہوں گے۔ بعد ازاں وہ 18 فروری کو لندن سے واشنگٹن کے لیے روانہ ہوں گے۔
ذرائع کا مزید کہنا ہے کہ وزیراعظم 19 فروری کو واشنگٹن میں بورڈ آف پیس کی نشست میں شرکت کریں گے، جبکہ 20 فروری کو امریکی صدر سے ان کی دوطرفہ ملاقات کا بھی امکان ہے۔
وزیراعظم کے ہمراہ اعلیٰ شخصیات اور حکام پر مشتمل ایک وفد بھی ہوگا۔
