ازبک صدر کا گلوبل انڈسٹریل اینڈ ڈیفنس سلوشنز کا دورہ، دفاعی تعاون بڑھانے کا عزم

راولپنڈی(آئی پی ایس )پاکستان کا دورہ کرنے والے صدر ازبکستان شوکت مرزا ئیوف نے سینیئر وزرا کے ہمراہ پاکستان کے اہم دفاعی و صنعتی ادارے گلوبل انڈسٹریل اینڈ ڈیفنس سلوشنز کا دورہ کیا، دونوں ممالک نے دفاع، ٹیکنالوجی اور صنعتی شعبوں میں تعاون کو مزید فروغ دینے کے عزم کا اعادہ کیا۔
پاک فوج کے شعبہ تعلقات عامہ (آئی ایس پی آر)کے مطابق چیف آف آرمی سٹاف و چیف ڈیفنس سٹاف فیلڈ مارشل سید عاصم منیر نے صدر شوکت مرزائیوب اور ان کے وفد کا گرمی سے استقبال کیا اور ادارے کا مکمل دورہ کروایا، اس دوران صدر کو GIDS کے مختلف شعبوں سے متعلق بریفنگ دی گئی، جس میں جدید دفاعی حل، صنعتی صلاحیتیں اور تکنیکی ایجادات شامل تھیں۔صدر اور ان کے وفد نے اہم سہولیات کا معائنہ کیا اور پاکستان میں مقامی دفاعی پیداوار اور صنعتی ترقی کے مختلف شعبوں کی ترقی دیکھنے کا موقع حاصل کیا۔ دورے نے پاکستان کی دفاعی صنعت میں بڑھتی ہوئی مہارت اور ٹیکنالوجی میں خود کفالت کو اجاگر کیا۔
دونوں ممالک نے اس بات پر زور دیا کہ دفاع، ٹیکنالوجی اور صنعتی شعبوں میں شراکت داری، علم کے تبادلے اور مشترکہ منصوبوں کو فروغ دینا انتہائی اہم ہے۔ اس دورے نے پاکستان اور ازبکستان کے تعلقات کو مستحکم کرنے اور تعاون کے مختلف مواقع تلاش کرنے میں اہم قدم کے طور پر پیش کیا گیا۔یہ دورہ دوطرفہ تعلقات کو نئی جہت دینے اور مشترکہ سرمایہ کاری، تکنیکی اشتراک اور صنعتی منصوبوں کے مواقع تلاش کرنے کے لیے ایک سنگِ میل کی حیثیت رکھتا ہے۔ دونوں ممالک نے تعلقات کو مزید مستحکم بنانے اور خطے میں تعاون کے نئے راستے کھولنے پر اتفاق کیا۔