اسلام آباد(آئی پی ایس )پاکستان ڈیجیٹل کوآپریشن آرگنائزیشن کا صدر منتخب، وزیر مملکت شزا فاطمہ خواجہ نے پاکستان کی جانب سے صدارت سنبھالی۔کویت میں ڈی سی او کی پانچویں جنرل اسمبلی ہوئی جس میں 16 ممالک کے اعلی حکام شریک ہوئے۔
اس موقع پر گفتگو کرتے ہوئے وفاقی وزیرانفارمیشن ٹیکنالوجی شزا فاطمہ خواجہ نے کہا کہ آرگنائزیشن کا صدر منتخب ہونا پاکستان کے لیے اعزاز ہے۔شزا فاطمہ خواجہ کا کہنا تھا کہ آئی ٹی اور سکلزڈویلپمنٹ کے شعبے میں تعاون بڑھانے کے لیے پرعزم ہیں، فورم کے تحت مختلف شعبوں میں تعاون کا فروغ ترجیح ہے۔انہوں نے کہا کہ سعودی عرب کے ساتھ مختلف شعبوں میں تعلقات کو نئی وسعت ملی ہے، دونوں ملکوں کی قیادت کے درمیان اعلی سطح روابط اہمیت کے حامل ہیں۔
وزیرآئی ٹی نے کہا کہ ڈیجیٹل تعاون، سائبر سکیورٹی اور اے آئی میں عالمی شراکت داری کو فروغ دیا جائے گا، ڈیجیٹل تعلیم اور محفوظ آن لائن ماحول ترجیحات میں شامل ہیں۔وزارت آئی ٹی کے مطابق نوجوانوں اور خواتین کو ڈیجیٹل انقلاب کے فوائد دلانے پر زور دیا جائیگا، پاکستان عالمی ڈیجیٹل مباحثوں میں مضبوط کردار ادا کرے گا۔
