دنیا پاکستان کیساتھ کھڑی ہے،واشنگٹن میں پاکستان کی خارجہ پالیسیوں کا اثر نظر آ رہا ہے، خواجہ آصف

اسلام آباد (سب نیوز)وزیرِ دفاع خواجہ آصف نے امریکی جریدے فارن پالیسی کی پاکستان کی سفارتی کامیابیوں سے متعلق رپورٹ پر ردعمل دیتے ہوئے کہا ہے کہ دنیا آج پاکستان کے موقف کے ساتھ کھڑی ہے اور خارجہ پالیسی کے اثرات واضح طور پر نظر آ رہے ہیں، جو پاکستان کے لیے ایک بڑی کامیابی ہے۔
وزیرِ دفاع خواجہ آصف کا کہنا ہے کہ عالمی سطح پر معتبر جریدے فارن پالیسی کی جانب سے پاکستان کی خارجہ پالیسی کا اعتراف خوش آئند اور بڑی کامیابی ہے۔انہوں نے کہا کہ اس رپورٹ سے ثابت ہوتا ہے کہ پاکستان کی خارجہ پالیسی نے عالمی سطح پر مثبت اثرات مرتب کیے ہیں۔نجی ٹی وی سے گفتگو کرتے ہوئے خواجہ آصف نے کہا کہ واشنگٹن میں پاکستان کی خارجہ پالیسیوں کا اثر نمایاں طور پر محسوس کیا جا سکتا ہے اور یہ پیش رفت پاکستان کے لیے بڑی فتح ہے۔
وزیرِ دفاع خواجہ آصف نے کہا کہ پاکستان نے اپنے سے پانچ گنا بڑے ملک کو شکست دے کر اپنی عسکری برتری کو ثابت کیا، جس کا اعتراف امریکا سمیت دیگر ممالک نے بھی کیا۔ انہوں نے کہا کہ آج پاکستان کو دہشت گردی کے خلاف ایک فرنٹ لائن اسٹیٹ کے طور پر تسلیم کیا جا رہا ہے۔خواجہ آصف کا مزید کہنا تھا کہ افغانستان سے ہونے والی دہشت گردی کے معاملے پر بھی عالمی برادری پاکستان کے مقف کی حمایت کر رہی ہے، جو ایک اہم سفارتی پیش رفت ہے۔انہوں نے کہا کہ عسکری اور سیاسی قیادت ملک کو مشکلات سے نکالنے کے لیے پرعزم ہے اور اسی باہمی تعاون کے نتیجے میں پاکستان کو 2025 میں بڑی کامیابیاں حاصل ہوئیں۔وزیرِ دفاع خواجہ آصف نے کہا کہ قوم کو ان کامیابیوں پر سیاسی اور عسکری قیادت کا شکر گزار ہونا چاہیے۔