لندن(آئی پی ایس )پاکستان تحریکِ انصاف کے رہنما زلفی بخاری کے خلاف انٹرپول کی جانب سے جاری ریڈ نوٹس منسوخ کر دیا گیا ہے، جس کے بعد انٹرپول نے ان کے خلاف تمام تفتیش ختم کرنے کی باضابطہ تصدیق بھی کر دی ہے۔ اس پیش رفت کو پاکستانی وزارتِ داخلہ کی کوششوں کے لیے ایک بڑا دھچکا قرار دیا جا رہا ہے۔
قابلِ اعتماد ذرائع کے مطابق پاکستان کی جانب سے زلفی بخاری کی حوالگی کے لیے دی گئی درخواست کو انٹرپول نے مسترد کر دیا۔ انٹرپول نے ذلفی بخاری کے وکلا کو ارسال کیے گئے خط میں واضح کیا کہ پاکستان کی جانب سے فراہم کردہ معلومات اور شواہد کا تفصیلی جائزہ لینے کے بعد ریڈ نوٹس منسوخ کرنے کا فیصلہ کیا گیا۔یاد رہے کہ تقریبا دو برس قبل پاکستانی وزارتِ داخلہ نے مونس الہی اور زلفی بخاری کے خلاف ریڈ نوٹس کے اجرا کے لیے انٹرپول سے رجوع کیا تھا۔ زلفی بخاری پر بانی پی ٹی آئی کی جوڈیشنل کمپلیکس میں پیشی کے موقع پر ہنگامہ آرائی اور دہشت گردی کے مبینہ واقعات میں ملوث ہونے کے الزامات عائد کیے گئے تھے، جبکہ وہ القادر ٹرسٹ کیس میں بھی پاکستانی حکام کو مطلوب قرار دیے جا رہے تھے۔
