صوابی(آئی پی ایس ) سابق اسپیکرقومی اسمبلی اسد قیصر نے کہا کہ خیبر پختونخوا وہ خطہ ہے جو ہمیشہ سے دہشت گردی کا براہِ راست نشانہ بنتا رہا ہے۔سابق اسپیکرقومی اسمبلی نے کہا کہ افغان جنگ نے صوبے کو سب سے زیادہ نقصان پہنچایا، یہی جنگ کلاشنکوف کلچر کا باعث بنی اوراس کے نتیجے میں صوبے کی معیشت تباہ ہو گئی۔
ان کا کہنا تھا کہ آج بھی ہم افغان جنگ کے منفی اثرات کا خمیازہ بھگت رہے ہیں اور 9/11 کے بعد دہشت گردی کے خلاف عالمی جنگ نے صوبے کی مشکلات میں مزید اضافہ کیا اس دوران ہزاروں پولیس اورفوجی جوانوں نے اپنی جانوں کے نذرانے پیش کئے جبکہ کاروباراورگھرتباہ ہو گئے۔اسد قیصر نے کہا کہ خیبر پختونخوا کے ساتھ ہمیشہ سوتیلی ماں جیسا سلوک ہوا، جس کے باعث سرمایہ داروں نے اپنا کاروبار دوسرے شہروں میں منتقل کر لیا۔انہوں نے سوال اٹھایا کہ پشاور کا تاجر آخر لاہور اور کراچی سے کس طرح مقابلہ کرے؟ ان کے مطابق جب تک افغانستان اورسینٹرل ایشیا کیساتھ تجارت نہیں کھلتی، خیبر پختونخوا معاشی طور پرترقی نہیں کرسکتا۔اسد قیصرکا مطالبہ تھا کہ سفارت کاری کو موقع دیا جائے اورجو ممالک امن کے لئے کوششیں کر رہے ہیں وہ اپنی کوششیں جاری رکھیں۔
عمران خان سے ملاقات نہ کروائے جانے پرانہوں نے شدید تحفظات کا اظہار کیا اور کہا کہ جیل مینوئل میں ہر قیدی کو ملاقات کی اجازت ہوتی ہے مگرسابق وزیراعظم کو اس حق سے محروم کیا جا رہا ہے۔انہوں نے خبردار کیا کہ ہمیں دیوار سے نہ لگایا جائے، ہم قانون و آئین پر یقین رکھتے ہیں اور چاہتے ہیں کہ انہیں ہی موقع دیا جائے۔
