اسلام آباد (سب نیوز) وفاقی ترقیاتی ادارے (سی ڈی اے) نے وفاقی دارالحکومت کے گاؤں سید پور میں غیر قانونی تعمیرات کے خلاف بڑا آپریشن کیا، جس کے دوران متعدد غیر قانونی رہائش گاہیں خالی کرا لی گئیں۔
ترجمان سی ڈی اے کے مطابق آپریشن چیئرمین سی ڈی اے اور چیف کمشنر اسلام آباد محمد علی رندھاوا کی ہدایت پر شروع کیا گیا۔ آپریشن میں سی ڈی اے کی انفورسمنٹ ٹیم اور ڈیزاسٹر مینجمنٹ اتھارٹی (ڈی ایم اے) کی ٹیموں نے حصہ لیا۔
ترجمان نے بتایا کہ جن گھروں کے خلاف کارروائی کی گئی، انہیں پہلے نوٹسز جاری کیے گئے تھے، تاہم نوٹسز کے باوجود غیر قانونی گھر خالی نہیں کیے گئے جس پر قانون کے مطابق گھروں کو خالی کروایا گیا۔
بعض رہائشیوں نے علاقے میں ہونے والے اعلانات کے بعد رضاکارانہ طور پر گھر خالی کر دیے۔
سی ڈی اے کی جانب سے جاری بیان میں کہا گیا کہ آپریشن کی نگرانی ڈائریکٹر ڈی ایم اے اور سی ڈی اے کی ڈپٹی ڈی جی انفورسمنٹ ڈاکٹر انعم فاطمہ نے کی۔ ترجمان کے مطابق غیر قانونی تعمیرات کے خلاف زیرو ٹالرنس کی پالیسی پر عمل کیا جا رہا ہے اور مستقبل میں بھی اس نوعیت کی کارروائیاں جاری رہیں گی۔
