اسلام آباد (آئی پی ایس) وزیراعظم شہباز شریف نے ملک بھر کے بجلی صارفین کے لیے ایک بڑا ریلیف دیتے ہوئے بجلی کے بلوں سے پی ٹی وی لائسنس فیس ختم کرنے کا اعلان کر دیا ہے۔ اس کے ساتھ ہی انہوں نے بجلی کے شعبے میں شفافیت اور اصلاحات کے لیے ”اپنا میٹر، اپنی ریڈنگ“ کے عنوان سے نئی موبائل ایپ کے باضابطہ اجرا کا اعلان کیا ہے۔
تفصیلات کے مطابق اسلام آباد میں منعقدہ ”پاور اسمارٹ موبائل ایپ“ کی افتتاحی تقریب سے خطاب کرتے ہوئے وزیراعظم نے کہا کہ ”اپنا میٹر، اپنی ریڈنگ“ منصوبے کا آغاز صارفین کو بااختیار بنانے کی طرف اہم قدم ہے۔ ان کا کہنا تھا کہ بجلی کے بلوں، میٹر ریڈنگ اور اوور بلنگ سے متعلق عوامی شکایات کے حل کے لیے اس ایپ کو متعارف کرایا گیا ہے، تاکہ ہر صارف اپنے میٹر کی ریڈنگ خود اپ لوڈ کر کے درست بل حاصل کر سکے۔
وزیراعظم نے کہا کہ بجلی کی قیمتوں میں کمی ان کی حکومت کی اہم ترجیح رہی ہے۔ انہوں نے بتایا کہ آئی پی پیز (نجی بجلی گھروں) کے ساتھ طویل مذاکرات کے بعد کامیابی حاصل کی گئی، جس کے باعث بجلی کی قیمتوں میں ساڑھے 4 روپے فی یونٹ کمی ممکن ہوئی۔ ان کا کہنا تھا کہ حکومت نے عالمی منڈی میں تیل کی قیمتوں میں کمی کا براہِ راست فائدہ عوام تک منتقل کیا، جس کے نتیجے میں بجلی کی قیمت مزید ساڑھے 7 روپے فی یونٹ کم کی گئی۔
شہباز شریف کا کہنا تھا کہ کچھ عرصہ قبل یہ اندیشہ ظاہر کیا جا رہا تھا کہ بجلی کی بنیادی قیمت میں سالانہ ایڈجسٹمنٹ کے تحت 50 سے 70 پیسے فی یونٹ اضافہ ہو سکتا ہے، مگر حکومت نے عوام پر یہ بوجھ نہ ڈالنے کا فیصلہ کیا۔ اسی تسلسل میں آج ملک بھر میں بجلی کے بلوں سے پی ٹی وی لائسنس فیس کو مکمل طور پر ختم کرنے کا اعلان کیا جا رہا ہے۔
وزیراعظم نے کہا کہ توانائی کے شعبے میں بجلی چوری ایک سنگین مسئلہ ہے، جس کے خاتمے کے لیے جامع اقدامات کیے جا رہے ہیں۔ انہوں نے مزید کہا کہ شمسی توانائی کے فروغ نے بجلی کی کھپت کو کم کرنے میں مدد دی ہے اور حکومت صارفین کے حقوق کے تحفظ کے لیے پرعزم ہے۔
خطاب کے دوران وزیراعظم نے وفاقی وزیر توانائی کی کاوشوں کو سراہتے ہوئے کہا کہ انہوں نے بجلی کی قیمتوں میں کمی کے لیے پاکستانی سرمایہ کاروں سے سخت مگر کامیاب مذاکرات کیے، سرکلر ڈیٹ کا مسئلہ حل کیا اور بینکوں سے بات چیت کے ذریعے شرحِ سود میں کمی کرائی، جو بجلی کی لاگت کو کم کرنے کی سمت اہم قدم ہے۔
وزیراعظم نے کہا کہ حکومت توانائی کے شعبے میں اصلاحات کو مزید تیز کرنا چاہتی ہے تاکہ پائیدار ترقی کی راہ ہموار ہو اور عوام کو حقیقی ریلیف مل سکے۔
