اسلام آباد(آئی پی ایس) چیئرمین کیپیٹل ڈیولپمنٹ اتھارٹی (سی ڈی اے) محمد علی رندھاوا نے ممبر انجینئرنگ اور دیگر متعلقہ افسران کے ہمراہ جناح اسکوائر مری روڈ انڈر پاس منصوبے کا دورہ کیا۔ اس موقع پر انہیں کنٹریکٹرز، کنسلٹنٹس اور متعلقہ افسران کی جانب سے منصوبے کی موجودہ صورتحال اور تعمیراتی سرگرمیوں کی تفصیلات پر بریفنگ دی گئی۔
وزیر داخلہ محسن نقوی کی خصوصی ہدایت پر منصوبے کو رواں ماہ مکمل کرنے کے لیے تعمیراتی کام دن رات جاری ہے۔ بریفنگ کے مطابق منصوبے کا 75 فیصد کام مکمل ہو چکا ہے جبکہ سلپس روڈز کی تعمیر تکمیلی مراحل میں داخل ہو چکی ہے۔
چیئرمین سی ڈی اے نے ہدایت جاری کی کہ منصوبے کے تمام حصوں پر بیک وقت کام کو یقینی بنایا جائے تاکہ رفتار مزید تیز ہو اور مقررہ مدت کے اندر منصوبے کی تکمیل ممکن ہو۔ انہوں نے واضح کیا کہ تعمیراتی معیار اور کوالٹی پر کسی بھی قسم کا سمجھوتہ برداشت نہیں کیا جائے گا۔
محمد علی رندھاوا نے کنسلٹنٹس، ریزیڈنٹ انجینئرز اور پراجیکٹ ڈائریکٹر کو ہدایت کی کہ سائٹ پر اعلیٰ معیار اور بروقت تکمیل کو ہر صورت یقینی بنایا جائے۔
انہوں نے کہا کہ منصوبے کی تکمیل سے نہ صرف مسافروں کے وقت اور ایندھن کی بچت ہوگی بلکہ نیو انٹرنیشنل ایئرپورٹ اسلام آباد سے مری اور کشمیر تک سگنل فری سفر کی سہولت بھی میسر آئے گی۔
چیئرمین سی ڈی اے کے مطابق یہ منصوبہ اسلام آباد کے روڈ انفراسٹرکچر کے حوالے سے ایک اہم سنگ میل ثابت ہوگا اور اس کی تکمیل سے وفاقی دارالحکومت کے مجموعی انفراسٹرکچر میں نمایاں بہتری آئے گی۔
