اسلام آباد،وفاقی حکومت نے ملک میں مقیم غیرملکیوں کو نادرا کارڈ جاری کرنے کا فیصلہ کرلیا ، غیر ملکیوں کو 3کارڈز کا اجرا کیا جائے گا
پاکستان میں مقیم غیرملکیوں کے لیے وفاقی حکومت نے بڑا فیصلہ کرتے ہوئے کہا ہے کہ ملک میں رہنے والے غیر قانونی تارکین وطن کو جلد نادرا کارڈ کا اجرا کیا جائے گا۔ذرائع کا کہنا ہے کہ نیشنل ایلین رجسٹریشن اتھارٹی (نا را)کے پاس اس وقت ایک لاکھ بیس ہزار لوگوں کا ریکارڈ موجود ہے، غیر ملکیوں کو 3کارڈ کا اجرا کیا جائے گا ، پہلے مرحلے میں آئی ڈی کارڈ فار ایلین دیا جائے گا۔آئی ڈی کارڈ حاصل کرنے والے کو ملک میں کام کرنے کیلئے ورک پرمٹ کارڈ بھی حاصل کرنا ہو گا، دونوں کارڈ حاصل کرنے والے سرکاری نوکری حاصل نہیں کرسکیں گے۔ بچوں کے لئے جیونائل کارڈ جاری کئے جائیں گے، جس کے ذریعے اسکول میں داخلہ مل سکے گا، پہلے تارکین وطن کے بچے نویں جماعت کے بعد تعلیم کا حصول نہیں کر پاتے تھے ، اب ممکن ہوگا۔ذرائع کے مطابق ایلین کارڈ بننے کے بعد یہ تمام افراد بینک اکاونٹ اور موبائل سم ، یوٹیلیٹی کنکشن ،ڈرائیونگ لائسنس بھی حاصل کرسکیں گے، ان تمام افراد کا بائیو میٹرک اور نادرا کی طرح مخصوص نمبر بھی جاری کیا جائے گا۔ ایک شہر سے دوسرے شہر میں منتقل ہونے کی صورت میں اتھارٹی کو آگاہ کرنا ہوگا، نارا کارڈ نادرا کے دفاتر سے جاری کئے جائیں گے، کارڈ کی پراسسنگ کے حوالے سے میکنزم طے کئے جارہے ہیں ۔
