معروف بھارتی اداکار نانا پاٹیکر 75 برس کی عمر میں انتقال کر گئے

معروف بھارتی اداکار اور فلم ساز نانا پاٹیکر 75 برس کی عمر میں انتقال کر گئے۔
بھارتی میڈیا کے مطابق نانا پاٹیکر کو جمعرات کی صبح گوا میں واقع اپنی رہائش گاہ پر بے ہوش پایا گیا جس کے بعد انہیں فوری طور پرقریب ہی واقع منی پال اسپتال منتقل کیا گیا۔
اسپتال حکام کے مطابق ڈاکٹرز نے اداکار کو بچانے کے لیے تقریباً 45 منٹ تک مسلسل سی پی آر کیا تاہم وہ جانبر نہ ہوسکے۔ انہیں صبح 5 بج کر 20 منٹ پر مردہ قرار دیا گیا۔
منی پال اسپتال کے سینئر ڈاکٹر شیکھر سالکر کے مطابق نانا پاٹیکر کو اسپتال لایا گیا تو وہ پہلے ہی انتقال کرچکے تھے، بعد ازاں ان کی میت پوسٹ مارٹم کے لیے گوا میڈیکل کالج منتقل کردی گئی۔
ڈاکٹر کے مطابق نانا پاٹیکر کے کیئر ٹیکر نے تقریباً4 بج کر 18 سے 20 منٹ کے درمیان اسپتال سے ایمبولینس لی اور قریب ہی واقع اداکار کے فلیٹ پر پہنچا۔
ان کا کہنا تھا کہ جب طبی ٹیم وہاں پہنچی تو نانا پاٹیکر زمین پر بے ہوشی کی حالت میں موجود تھے۔انہیں موقع پر ہی سی پی آرشروع کیا اور اسی دوران اسپتال منتقل کیا گیا۔
انہوں نے بتایا کہ اداکار کو تقریباً 10 منٹ میں اسپتال پہنچایا گیا وہاں بھی سی پی آر جاری رکھا گیا تاہم ان کی حالت میں کوئی بہتری نہیں آئی۔
ڈاکٹر کے مطابق ایسا محسوس ہورہا تھا کہ نانا پاٹیکر کو اسپتال لانے سے پہلے ہی موت واقع ہوچکی تھی۔انہوں نے کہا کہ نانا پاٹیکر کی موت کارڈیک اریسٹ کے باعث ہوئی تاہم اس کی اصل وجہ فی الحال معلوم نہیں ہوسکی۔
سینئر ڈاکٹر نے بتایا کہ نانا پاٹیکر پہلے سے دل کے مریض تھے اور انہیں ادویات بھی دی جارہی تھیں۔
نانا پاٹیکر کی فنی زندگی
نانا پاٹیکر ہندی اور مراٹھی فلم انڈسٹری کے معروف اور بااثر اداکاروں میں شمار ہوتے تھے۔ ان کا فلمی کیریئر کئی دہائیوں پر محیط رہا اور وہ اپنی منفرد اداکاری، طاقتور مکالموں اور مختلف نوعیت کے کرداروں کے لیے شہرت رکھتے تھے۔
انہوں نے متعدد مقبول فلموں میں اداکاری کی جن میں پرندا، پراہار، کرانتی ویر، ترنگا، خاموشی اور ویلکم شامل ہیں۔
مراٹھی سنیما میں بھی نانا پاٹیکر کی اداکاری کو نمایاں مقام حاصل رہا اور فلم نٹ سمراٹ میں ان کے کردار کو خاص طور پر سراہا گیا۔
رپورٹس کے مطابق واقعے کے حوالے سے میڈیکو لیگل کیس بھی درج کیا گیا ہے جبکہ موت کی حتمی وجوہات کے تعین کے لیے پوسٹ مارٹم کیا جائے گا۔
ان کے انتقال کی خبر کے بعد پورے بھارت میں سوگ کی کیفیت ہے۔
بھارتی وزیر اعظم نریندر مودی نے ایکس پر پوسٹ کرتے ہوئے لکھا کہ بہت کم اداکار ایسے تھے جن میں نانا پاٹیکر جیسی شدت، انفرادیت اور ناقابلِ فراموش شخصیت موجود تھی۔ انہوں نے ہر کردار میں غیر معمولی صلاحیت اور تخلیقی انداز کا مظاہرہ کیا اور ایسے کردار ادا کیے جو آنے والی نسلوں تک یاد رکھے جائیں گے۔
نریندر مودی نے مزید لکھا کہ نانا پاٹیکر اپنے بے باک اور دوٹوک خیالات کے باعث بھی قدر کی نگاہ سے دیکھے جاتے تھے۔ وہ اپنے نظریات کے اظہار میں کبھی ہچکچاتے نہیں تھے۔ہندی اور مراٹھی سنیما کے لیے نانا پاٹیکر کی خدمات بے مثال تھیں۔ ان کا انتقال ایک گہرا خلا چھوڑ گیا ہے۔میں ان کے اہلِ خانہ، دوستوں اور بے شمار مداحوں سے دلی تعزیت کا اظہار کرتا ہوں۔
بھارتی وزیر داخلہ امیت شاہ کا کہنا تھا کہ عظیم بھارتی اداکار نانا پاٹیکر جی کا انتقال فن کی دنیا کے لیے ایک ناقابلِ تلافی نقصان ہے۔ پانچ دہائیوں سے زائد عرصے پر محیط اپنے فلمی سفر میں انہوں نے فطری اداکاری اور پُراثر مکالموں کی ادائیگی کے ذریعے ناظرین کے دلوں پر انمٹ نقوش چھوڑے۔
چاہے سنجیدہ سماجی مسائل ہوں یا مزاح و طنز، انہوں نے اپنے ہر کردار میں حقیقت کا رنگ بھر دیا۔ ‘نام فاؤنڈیشن’ کے ذریعے خشک سالی سے متاثرہ کسان خاندانوں کی خدمت ہو یا سرحد پر جا کر فوجی جوانوں کا حوصلہ بڑھانا، شہرت کی بلندیوں پر پہنچنے کے باوجود وہ اپنی جڑوں سے جڑے رہے۔جب بھی ان سے ملاقات ہوئی، ان کی سادگی اور صاف گوئی نے ہمیشہ گہرا اثر چھوڑا۔
بھارتی اداکار ریتیش دیش مکھ نے ایکس پر نانا پاٹیکر کے انتقال پر گہرے صدمے کا اظہار کیا۔ انہوں نے لکھا کہ وہ صدمے میں ہیں اور یہ خبر ایسے محسوس ہوئی جیسے انہیں کسی ٹرک نے ٹکر مار دی ہو۔ ریتیش نے نانا پاٹیکر کو بے مثال اداکار قرار دیتے ہوئے کہا کہ کوئی ایسا کردار نہیں تھا جو وہ ادا نہ کرسکتے ہوں۔
بھارتی اداکار اکشے کمار نے ایکس پر پوسٹ کرتے ہوئے لکھا کہ نانا جی کے انتقال کی خبر سن کر دل بہت افسردہ ہے۔ وہ ان نایاب اداکاروں میں سے تھے جنہیں ناظرین کی توجہ حاصل کرنے کے لیے بہت کچھ کرنے کی ضرورت نہیں پڑتی تھی۔ ان کی آواز، ان کی شدت اور ہر کردار میں نظر آنے والی سچائی انہیں دوسروں سے منفرد بناتی تھی۔
میں خود کو خوش قسمت سمجھتا ہوں کہ مجھے ان کے ساتھ فلم ویلکم میں کام کرنے کا موقع ملا اور پھر حال ہی میں ہاؤس فل 5 میں بھی ہم نے ساتھ کام کیا۔ ان فلموں کے سیٹ پر گزرا وقت اور وہاں کی بہت سی یادیں ہمیشہ میرے دل کے قریب رہیں گی۔
نانا جی واقعی اپنی مثال آپ تھے۔ یہ یقین کرنا مشکل ہے کہ وہ اب ہمارے درمیان نہیں رہے۔ ان تمام خوبصورت یادوں کے لیے شکریہ۔ آپ کو جتنا یاد کیا جائے، شاید الفاظ میں بیان کرنا ممکن نہیں۔
اداکار سیاجی شندے نے نانا پاٹیکر کے انتقال پر گہرے صدمے کا اظہار کرتے ہوئے کہا ہے کہ انہیں اس وقت سمجھ نہیں آرہا کہ کیا کہیں۔
سیاجی شندے نے بتایا کہ انہیں نانا پاٹیکر کے انتقال کی اطلاع تقریباً صبح 7 بجے ملی۔ اس وقت وہ کڈال میں شوٹنگ کر رہے تھے۔خبر سنتے ہی وہ فوری طور پر گوا روانہ ہوگئے تاکہ خود آکر حقیقت معلوم کرسکیں۔
سیاجی شندے کے مطابق انہیں یقین نہیں آرہا تھا کہ نانا پاٹیکر کے انتقال کی خبر درست ہے یا غلط، اسی لیے وہ گوا پہنچے۔انہوں نے کہا کہ نانا پاٹیکر کے انتقال کی خبر ان کے لیے بہت بڑا صدمہ ہے اور اس وقت وہ اس حوالے سے مزید کچھ کہنے کی حالت میں نہیں ہیں۔