اسلام آباد: چیئرمین سینیٹ کے مشیر مصباح کھر نے اسلام آباد میں پاکستان میں فلپائن کے سفیر سے ملاقات کی، جس میں پاکستان اور فلپائن کے درمیان دوطرفہ تعلقات اور باہمی دلچسپی کے مختلف امور پر تبادلہ خیال کیا گیا۔
ملاقات کے دوران دونوں ممالک کے درمیان تعاون کو مزید مضبوط بنانے کے مختلف امکانات کا جائزہ لیا گیا، خصوصاً پارلیمانی روابط اور سفارتی تعلقات کے فروغ پر گفتگو ہوئی۔
مشیر چیئرمین سینیٹ مصباح کھر نے پارلیمانی سفارت کاری کو مزید فعال بنانے اور دونوں ممالک کے پارلیمانی اداروں کے درمیان باقاعدہ روابط کی اہمیت پر زور دیا۔ انہوں نے کہا کہ ارکانِ پارلیمنٹ کے درمیان بڑھتے ہوئے تبادلے اور روابط باہمی افہام و تفہیم کے فروغ اور دوطرفہ تعلقات کو مستحکم بنانے میں اہم کردار ادا کر سکتے ہیں۔
فلپائن کے سفیر نے علاقائی اور بین الاقوامی تعاون کے فروغ میں پاکستان کے مثبت کردار کو سراہا اور دونوں ممالک کے درمیان دوطرفہ روابط کو مزید وسعت دینے کی خواہش کا اظہار کیا۔
ملاقات میں دونوں فریقوں نے پاکستان اور فلپائن کے درمیان دوستانہ تعلقات کو مزید گہرا کرنے اور باہمی دلچسپی کے مختلف شعبوں میں تعاون بڑھانے کے لیے کوششیں جاری رکھنے پر اتفاق کیا۔
