اردو، انگریزی، عربی اور بلتی سمیت 7زبانوں پر عبور رکھنے والے سفارتی ماہر سجاد حیدر خان نے ترجمان دفتر خارجہ کے عہدے کا چارج سنبھال لیا

اسلام آباد (سب نیوز)سجاد حیدر خان نے باضابطہ طور پر ترجمان دفتر خارجہ کا چارج سنبھال لیا ہے، جہاں وہ طاہر حسین اندراپی کی جگہ یہ ذمہ داری انجام دیں گے۔نوٹیفکیشن جاری ہونے کے بعد سابق ترجمان نے اپنی آخری نیوز بریفنگ کے دوران ان کا تعارف کروایا اور عہدہ نئے ترجمان کے سپرد کر دیا۔
گلگت بلتستان سے تعلق رکھنے والے سجاد حیدر خان اس وقت ڈائریکٹر جنرل ساوتھ ایشیا اور ترجمان دفتر خارجہ کے فرائض انجام دے رہے ہیں۔انہوں نے پنجاب یونیورسٹی لاہور سے پولیٹیکل سائنس میں ماسٹرز کی ڈگری حاصل کر رکھی ہے۔ اپنے سفارتی کیریئر کے دوران وہ دمشق، بڈاپسٹ، برلن اور جکارتہ میں پاکستانی مشنز میں خدمات انجام دے چکے ہیں، جبکہ وہ 2020 سے 2025 تک بیلاروس میں پاکستان کے سفیر بھی رہ چکے ہیں۔
سجاد حیدر خان کو متعدد زبانوں پر مہارت حاصل ہے وہ اردو، انگریزی، عربی اور بلتی بول سکتے ہیں جبکہ جرمن، انڈونیشین اور روسی زبانوں میں بھی خاصی مہارت رکھتے ہیں۔سابق ترجمان طاہر حسین اندراپی نے اپنی آخری پریس بریفنگ کے دوران سجاد حیدر خان کو باضابطہ طور پر میڈیا سے متعارف کروایا۔انہوں نے بتایا کہ وہ خود اب جنیوا میں اقوامِ متحدہ کے لیے پاکستان کے مستقل مندوب کے طور پر اپنی نئی ذمہ داریاں سنبھالیں گے۔طاہر اندراپی نے سجاد حیدر خان کی صلاحیتوں پر مکمل اعتماد کا اظہار کرتے ہوئے امید ظاہر کی کہ وہ ترجمان کے دفتر کی قیادت بہترین انداز میں کریں گے۔
واضح رہے کہ پاکستان کے دفتر خارجہ میں اعلی سطح کی سفارتی تبدیلیاں اور تبادلے ایک باقاعدہ اور پیشہ ورانہ عمل کا حصہ ہوتے ہیں، جس کا مقصد عالمی سطح پر پاکستان کی خارجہ پالیسی کے موثر نفاذ اور میڈیا کے ساتھ رابطوں کو مستحکم بنانا ہے۔ترجمان کا عہدہ عالمی منظر نامے پر ملکی مقف کی وضاحت کے لیے انتہائی حساس اور اہم تصور کیا جاتا ہے۔تجربہ کار سفارت کاروں کو اس اہم منصب پر فائز کر کے پاکستان دنیا کے سامنے اپنا موقف زیادہ واضح اور موثر انداز میں پیش کرنے کی حکمت عملی پر عمل پیرا ہے۔