اسلام آباد مفاہمتی یادداشت پر عملدرآمد ہی آگے بڑھنے کا واحد راستہ ہے، اسحاق ڈار اور عباس عراقچی میں اتفاق

بشکیک (سب نیوز)نائب وزیراعظم اسحاق ڈار اور ایرانی وزیر خارجہ عباس عراقچی کے درمیان بشکیک میں شنگھائی تعاون تنظیم (ایس سی او) سربراہ اجلاس سے قبل ملاقات ہوئی جس میں دو طرفہ تعلقات اور علاقائی صورتحال پر تبادلہ خیال کیا گیا۔
ترجمان دفتر خارجہ کے مطابق ملاقات کے دوران اسحاق ڈار نے کہا کہ خطے میں امن و استحکام کیلئے مذاکرات اور سفارت کاری ناگزیر ہے، اسلام آباد مفاہمتی یادداشت پر فریقین کا مخلصانہ عملدرآمد ہی آگے بڑھنے کا واحد راستہ ہے۔پاکستان اور ایران کے وزرائے خارجہ نے مسلسل رابطے جاری رکھنے کی اہمیت پر بھی اتفاق کیا۔
جون میں طے پانے والے اسلام آباد مفاہمتی یادداشت کے تحت 28 فروری کو ایران پر امریکی اور اسرائیلی حملوں سے شروع ہونے والی جنگ کے خاتمے کے لیے ایک فریم ورک فراہم کیا گیا تھا۔ یہ مفاہمتی یادداشت پاکستان اور دیگر ممالک کی جانب سے کی جانے والی ثالثی کی کوششوں کا نتیجہ تھی۔
اپریل میں بھی پاکستان نے امریکا اور ایران کے درمیان جنگ بندی کرانے میں اہم کردار ادا کیا تھا۔ تاہم وقفے وقفے سے ہونے والے حملوں، بالخصوص آبنائے ہرمز کے اطراف جاری کارروائیوں نے حتمی امن معاہدے کے امکانات کو دھندلا دیا ہے۔
دریں اثنا ایس سی او اجلاس کے موقع پر اسحاق ڈار نے ازبکستان کے وزیر خارجہ بختیار سعیدوف سے ملاقات کی۔ترجمان دفتر خارجہ کے مطابق اسحاق ڈار اور ازبک وزیر خارجہ نے پاکستان اور ازبکستان کے درمیان بڑھتی ہوئی شراکت داری کے عزم کا اعادہ کیا، دونوں وزرائے خارجہ نے باہمی دلچسپی کے تمام شعبوں میں تعاون مزید مضبوط بنانے پر تبادلہ خیال کیا اور پاک ازبک تعلقات مزید مستحکم بنانے پر اتفاق کیا۔علاوہ ازیں اسحاق ڈار اور بیلاروس کے وزیر خارجہ کی بھی ملاقات ہوئی، جس میں باہمی تعلقات، خطے کی صورتحال اور دیگر امور پر تبادلہ خیال کیا گیا۔