اسلام آباد (سب نیوز)پاکستان میں 5 فروری کو یومِ یکجہتی کشمیر کے موقع پر کشمیری عوام کی بھارتی تسلط اور مظالم کے خلاف جاری جدوجہدِ آزادی اور عظیم قربانیوں کو خراجِ تحسین پیش کیا جائے گا، اس سلسلے میں ملک بھر میں عام تعطیل ہوگی۔کشمیریوں سے اظہارِ یکجہتی کے لیے پورے ملک میں ریلیاں، واکس، سیمینارز اور خصوصی دعائیہ تقریبات کا اہتمام کیا جائے گا
جبکہ قومی یکجہتی کے اظہار کے طور پر مختلف مقامات پر انسانی زنجیریں بھی بنائی جائیں گی۔حکومت نے ریاستی اداروں اور میڈیا کو ہدایت جاری کی ہے کہ مسئلہ کشمیر کو موثر انداز میں اجاگر کیا جائے اور قومی و بین الاقوامی سطح پر اس حوالے سے آگاہی میں اضافہ کیا جائے۔اس موقع پر ٹیلی ویژن اور ریڈیو پر خصوصی پروگرام نشر کیے جائیں گے جن میں مسئلہ کشمیر کے تاریخی پس منظر اور موجودہ صورتحال پر تفصیلی روشنی ڈالی جائے گی۔
یومِ یکجہتی کشمیر کے پرامن انعقاد کو یقینی بنانے کے لیے بڑے شہروں میں سکیورٹی کے سخت انتظامات کیے جانے کا امکان ہے، جبکہ قانون نافذ کرنے والے ادارے ریلیوں اور عوامی اجتماعات کے دوران مکمل طور پر الرٹ رہیں گے۔سیاسی و مذہبی رہنما مختلف تقریبات سے خطاب کریں گے اور اس عزم کا اعادہ کریں گے کہ مسئلہ کشمیر کو اقوامِ متحدہ کی سلامتی کونسل کی قراردادوں کے مطابق حل کیا جانا ناگزیر ہے۔
