راولپنڈی انتظامیہ کا اڈیالہ کے راستے سیل کرنے اور ہجوم سے سختی کے ساتھ نمٹنے کااعلان ،جیل کی سیکورٹی کو ریڈ الرٹ کیا جائیگا

راولپنڈی (سب نیوز)پاکستان تحریک انصاف کی احتجاجی ریلی کے پیش نظر ضلعی انتظامیہ نے اڈیالہ جیل کی جانب جانے والی شاہراہ کو سیل کرنے کا فیصلہ کرلیا ، اڈیالہ روڈ کو کنٹینرز لگا کر سیل کیا جائے گا۔
تفصیلات کے مطابق راولپنڈی انتظامیہ نے اڈیالہ روڈ کو سیل کرنے کی منظوری دیدی، اڈیالہ روڈ کو سیل کرکے اڈیالہ جیل کی سیکورٹی کو ریڈ الرٹ کیا جائیگا جبکہ اطراف میں پنجاب رینجرز تعینات ہوگی، اسکے علاوہ راولپنڈی پولیس اور رینجرز کے جوان مشترکہ گشت کریں گے۔
اڈیالہ جیل کے قریب آنے والے ممکنہ مجمع کو سختی سے روکنے کا فیصلہ کیا گیا، تمام رکاوٹوں پر اینٹی رائٹس پولیس جوان تعینات ہوں گے، آنسو گیس اور ڈنڈوں سے لیس اہلکاروں کی اضافی نفری اڈیالہ روڈ پر تعینات ہوگی، کچری سے اڈیالہ جیل اور موٹروے چکری انٹرچینج سے آنے والی ٹریفک کو متبادل راستوں پر موڑ دیا جائے گا، اڈیالہ روڈ سے ملحقہ رابطوں سڑکوں کوبھی سیل کیا جائے گا۔
ادھر پی ٹی آئی کے 5 اگست کے حوالے سے پروگراموں سے نمٹنے کے لیے راولپنڈی پولیس فورس کو ڈیوٹی پوائنٹس پر موجود اور الرٹ رہنے کے احکامات جاری کردئیے گئے ہیں ۔ راولپنڈی پولیس نے بھی احتجاج کے دوران کسی بھی ہنگامی صورتحال سے نمٹنے کے لیے فورس کے لیے احکامات جاری کیے۔معلوم ہوا ہے سی پی او راولپنڈی خالد ہمدانی کی جانب سے ایس پی سیکورٹی نے مراسلہ جاری کیا ہے جس میں حکم دیاگیا ہے کہ راولپنڈی پولیس کی تمام فورس ڈیوٹی پوائنٹس پر موجود رہیں۔
مراسلے میں مزید کہا گیا ہے کہ تمام فورسز کے اہلکار تھانوں چوکیوں، گارڈ و دفاتر پر تاحکم ثانی ہر صورت میں حاضر رہیں اور تمام محرر فورس کی موجودگی کو یقینی بنائیں۔تاکہ کسی بھی ہنگامی صورتحال میں بروقت ڈیوٹی مہیا کی جاسکے۔