ڈی ایم اے کی جانب سے اے جے سی ایل کے ساتھ پارکنگ معاہدہ منسوخ ، بدعنوانی، غفلت اور عوامی نقصان پر فیصلہ کن کارروائی

اسلام آباد(سب نیوز)ڈائریکٹوریٹ آف میونسپل ایڈمنسٹریشن (ڈی ایم اے)نے مندرجہ ذیل وجوہات کی بنیاد پراے جے سی ایل کمپنی کے ساتھ پارکنگ سسٹم کا معاہدہ فوری طور پر منسوخ کر دیا

معاہدے کے برعکس کسی بھی پارکنگ سائٹ پر ڈیجیٹل انٹری/ داخلہ اور اخراج کے بیرئیرز سسٹمز نہیں لگائے گئے، پارکنگ فیس مکمل طور پر کیش میں لی گئی اور ڈی ایم اے کے ساتھ کوئی باقاعدہ ٹرانزیکشن ریکارڈ شیئر نہیں کیا گیا، ایک ہی کارڈ کو بارہا استعمال کیا گیا، جس سے سرکاری آمدن کو شدید نقصان پہنچا،کوئی مستند بینکاری ریکارڈ فراہم نہیں کیا گیا، صرف خطوط کے ذریعے غیر مصدقہ اعداد و شمار دیے گئے۔

معاہدے کے مطابق سیکیورٹی سسٹم نصب نہیں کیا گیا، جس سے گاڑیوں کی حفاظت کو شدید خطرات لاحق ہوئے،پارکنگ آمدن کا ریکارڈ 2 تا 3 روز بعد اپڈیٹ کیا جاتا رہا، جو شفافیت کے معیار پر پورا نہیں اترتا،کمپنی کی لاپروائی اور غیر ذمہ دارانہ رویے کے باعث پولیس اسٹیشن انڈسٹریل ایریا میںاے جے سی ایل کے خلاف گاڑیاں چوری ہونے پر 8ایف آئی آرز درج کی جا چکی ہیں،اے جے سی ایل نے معاہدہ منسوخی پر عدالت سے رجوع کیا ہے، ڈی ایم اے نے قانونی نمائندہ مقرر کر کے اپنا مفصل موقف عدالت میں پیش کرنے کا فیصلہ کیا ہے، معاہدہ منسوخ ہونے کے بعد ڈی ایم اے نے خود پارکنگ کنٹرول سنبھال لیا ہے اور آمدن میں نمایاں اضافہ ریکارڈ کیا گیا ہے۔