پاکستان نے وفاقی وزارتوں پر بھارت کے سائبر حملے ناکام بنا دیئے

اسلام آباد (سب نیوز)پاکستان نے بھارت کی جانب سے وفاقی وزارتوں پر سائبر حملے ناکام بنا دیئے۔
وفاقی وزیرآئی ٹی شزا فاطمہ نے کہا کہ بھارت کے سائبر حملوں سے کوئی بہت بڑا مسئلہ نہیں ہوا، پاکستان نے کامیابی سے حملے ناکام بنائے۔انہوں نے کہا کہ سائبرحملوں کا کوئی اثر ٹیلی کام سیکٹر پر نہیں آیا، وفاقی وزارتوں کی ویب سائٹس کی ہوسٹنگ این ٹی سی پر ہے ، این ٹی سی کے پاس سائبرسکیورٹی کا بہترین سسٹم ہے۔
وفاقی وزیر کا کہنا تھا کہ کمپیوٹر ایمرجنسی رسپانس ٹیمیں تشکیل دی جا چکی ہیں ، سائبرحملوں سے متعلق این ٹی آئی ایس پی بھی فعال ہے ، پاکستان سائبرسکیورٹی کے لحاظ سے ٹاپ ممالک کی فہرست میں شامل ہے۔انہوں نے مزید کہا کہ پاکستان نے ہمیشہ امن کی بات کی ، ہم کسی سے ڈرنے والے نہیں۔