اسلام اباد (سب نیوز )پاکستان اور متحدہ عرب امارات نے دونوں ممالک کے درمیان فلائٹس کی تعداد بڑھانے پر اتفاق کیا ہے۔اس مقصد کے لیے پاکستان کی ایئرسیال اور ہنگری کی ویزایئر دونوں ممالک کے درمیان پروازیں چلائیں گی۔متحدہ عرب امارات میں پاکستان کے سفیر فیصل نیاز ترمذی نے جمعے کے روز عرب نیوز کو بتایا کہ یہ پیش رفت دونوں ممالک کے مضبوط اور پائیدار تعلقات کی نشان دہی کرتی ہے۔
انہوں نے مزید کہا کہ معاہدے کے تحت پاکستان کی نجی ایئرلائن ایئرسیال جلد ملک کے تین شہروں سے ابو ظبی کے لیے اپنے آپریشنز کا آغاز کر رہی ہے۔ اس کے ساتھ ہی ویز ایئر ابو ظبی اور پاکستان کے دو شہروں کے درمیان فلائٹس چلائے گی جس سے مسافروں کو سستا سفر میسر ہو سکے گا۔پاکستانی سفیر کا کہنا تھا کہ فلائٹس آپریشن میں توسیع سے دونوں ممالک کے درمیان سفر کرنے والے مسافروں اور سیاحت کو فائدہ ہوگا۔
ایئر سیال پاکستان کی نجی ایئرلائن ہے جس کا آغاز 25 دسمبر 2020 کو ہوا تھا۔ ایئر سیال نے پہلے مقامی فلائٹس شروع کیں اور بعد ازاں بین الاقوامی آپریشنز کا آغاز کیا۔ پاکستان کی نجی ایئرلائن کی پہلی بین الاقوامی پرواز 29 مارچ 2023 کو شاہ عبدالعزیز انٹرنیشنل ایئرپورٹ جدہ پہنچی تھی۔ جون 2023 میں ایئر سیال نے اپنے آپریشنز کو اومان کے دارالحکومت مسقط تک توسیع دے دی۔
