اسلام آباد (سب نیوز )پاکستان میں ایتھوپیا کے سفیر ڈاکٹر جمال بکر عبداللہ کی وزیر تجارت جام کمال خان کے ساتھ ملاقات،ملاقات میں باہمی دلچسپی کے امور پر تبادلہ خیال کیا گیا۔ ملاقات میں پاکستان کی طرف سے 2025 کی سنگل کنٹری نمائش ایتھوپیا کے دارالخلافہ ادیس ابابہ میں کرا نے پر اتفاق کیا گیا۔
اس موقع پر ایتھوپین سفیر نے کہا کہ ادیس ابابا میں سنگل کنٹری نمائش سے دونوں ممالک کے تعلقات مزید مستحکم ہوں گے۔ایتھوپیا کی “ہوم گرون اکنامک ریفارمز” سرمایہ کاروں کے لیے دوستانہ ماحول فراہم کر رہی ہیں۔پاکستان اور ایتھوپیا کے درمیان فلائٹ آپریشنز تجارت اور روابط میں بہتری لارہے ہیں۔ ایتھوپیا پاکستانی تاجروں کے لیے تجارت اور سرمایہ کاری کے نئے مواقع فراہم کرے گا۔وزیر تجارت نے کہا کہ پاکستان اور ایتھوپیا کے تجارتی تعلقات کو وسعت دینے کا عزم، سنگل کنٹری نمائش مئی 2025 میں ہوگی۔
نمائش سے قبل دونوں ممالک کے کاروباری طبقے کے لیے پاکستان میں سیمینارز منعقد کیے جا رہے ہیں۔ایتھوپیا افریقہ میں اقتصادی ترقی کا مرکز بن رہا ہے، پاکستان اس موقع سے فائدہ اٹھائے گا ۔ادیس ابابا کی سنگل کنٹری نمائش پاکستانی تاجروں کو افریقی مارکیٹ میں مواقع فراہم کرے گی۔
