سہ ملکی سیریز، سری لنکا نے انگلینڈکیخلاف ون ڈے کی تاریخ کا دوسرا بڑا ہدف حاصل کرلیا، ہیری بروک کی ڈبل سنچری رائیگاں

راولپنڈی (سب نیوز)پاکستان، سری لنکا اور انگلینڈ کے درمیان ون ڈے ٹرائی سیریز کے تیسرے میچ میں سری لنکا نے سنسنی خیز مقابلے کے بعد انگلینڈ کو 2 وکٹوں سے شکست دیدی۔راولپنڈی کرکٹ اسٹیڈیم میں انگلینڈ نے پہلے بیٹنگ کرتے ہوئے 4 وکٹوں کے نقصان پر 429 رنز بنائے، تاہم سری لنکا نے ہدف 49.5 اوورز میں 8 وکٹوں کے نقصان پر حاصل کرلیا۔
انگلینڈ کے کپتان ہیری بروک نے 116 گیندوں پر 21 چوکوں اور 10 چھکوں کی مدد سے 202 رنز کی ناقابلِ یقین اننگز کھیلی۔ یہ ون ڈے کرکٹ میں انگلینڈ کی جانب سے پہلی ڈبل سنچری ہے۔ جو روٹ نے 69، ول جیکس نے ناقابلِ شکست 66 اور ٹام بینٹن نے 50 رنز بنائے۔ بروک اور روٹ نے تیسری وکٹ پر 159 رنز، جبکہ بروک اور جیکس نے چوتھی وکٹ پر 185 رنز کی شراکت قائم کی۔ سری لنکا کی جانب سے دونتھ ویلالگے نے 2 وکٹیں حاصل کیں۔
430 رنز کے ہدف کے تعاقب میں سری لنکا کے پون رتنائیکے نے 130رنز کی شاندار اننگز کھیلی، جبکہ اویشکا فرنینڈو 97رنز بنا کر آوٹ ہوئے۔ ڈاسن شاناکا نے بھی 50 گیندوں پر 97رنز کی جارحانہ اننگز کھیل کر ٹیم کی کامیابی میں اہم کردار ادا کیا۔ جینتھ لیانگے 61رنز بنا کر ناٹ آوٹ رہے اور اسیتھا فرنینڈو ایک رن کے ساتھ ناٹ آوٹ پویلین لوٹے۔
انگلینڈ کی جانب سے جوش ٹونگ نے 3 وکٹیں حاصل کیں، جبکہ سیم کرن نے 2کھلاڑیوں کو آوٹ کیا۔ جیمی اوورٹن اور لیام ڈاسن نے ایک، ایک وکٹ حاصل کی۔ اس سے قبل راولپنڈی کرکٹ اسٹیڈیم میں پاکستان نے 2023 میں نیوزی لینڈ کے خلاف 337 رنز بنائے تھے، تاہم انگلینڈ کا 429 رنز کا مجموعہ اس ریکارڈ سے کہیں آگے نکل گیا۔