اسلام آباد(سب نیوز)وفاقی وزیر برائے قومی غذائی تحفظ و تحقیق رانا تنویر حسین نے الیکٹرک گاڑیوں کی چارجنگ اور اسمارٹ انرجی سلوشنز فراہم کرنے والی عالمی کمپنی اسٹار چارج اور میکڈونلڈز پاکستان کے درمیان تعاون کے معاہدے کا خیرمقدم کرتے ہوئے اسے ملک میں الیکٹرک گاڑیوں کے لیے چارجنگ سہولیات کی توسیع اور ماحول دوست ٹرانسپورٹ کے فروغ کی جانب ایک اہم پیش رفت قرار دیا ہے۔
اسلام آباد میں منعقدہ تقریب سے خطاب کرتے ہوئے وفاقی وزیر نے اس اقدام کو سراہا اور کہا کہ اس نوعیت کی شراکت داریاں جدید اور ماحول دوست انفراسٹرکچر کی ترقی کے ساتھ پاکستان کو صاف توانائی کی جانب منتقل کرنے میں اہم کردار ادا کر سکتی ہیں۔وفاقی وزیر رانا تنویر حسین نے کہا کہ پاکستان کا مستقبل پائیدار ترقی، جدید ٹیکنالوجی اور ذمہ دارانہ سرمایہ کاری سے وابستہ ہے۔ اس طرح کے اقدامات اس بات کا عملی ثبوت ہیں کہ نجی شعبہ صاف توانائی کے فروغ، ماحولیاتی آلودگی میں کمی اور سرسبز پاکستان کی تعمیر کے لیے حکومتی کوششوں میں مثر کردار ادا کر سکتا ہے۔معاہدے کے تحت اسٹار چارج اور میکڈونلڈز پاکستان ملک بھر میں میکڈونلڈز کی موزوں شاخوں پر الیکٹرک گاڑیوں کے لیے چارجنگ اسٹیشنز قائم کرنے کے امکانات کا جائزہ لیں گے۔ اس اشتراک کے ذریعے اسٹار چارج کی جدید چارجنگ ٹیکنالوجی اور میکڈونلڈز کے وسیع کسٹمر نیٹ ورک کو یکجا کیا جائے گا، جس سے صارفین کو کھانے کے دوران اپنی الیکٹرک گاڑیاں چارج کرنے کی سہولت میسر آ سکے گی۔دونوں ادارے چارجنگ سہولیات کے قیام سے قبل ممکنہ مقامات کی تکنیکی موزونیت، بنیادی ڈھانچے کی ضروریات اور تجارتی امکانات کا مشترکہ جائزہ لیں گے۔
رانا تنویر حسین نے کہا کہ الیکٹرک گاڑیوں کے لیے چارجنگ انفراسٹرکچر کی توسیع سے روایتی ایندھن پر انحصار کم کرنے، ماحول دوست ذرائع آمدورفت کی حوصلہ افزائی اور توانائی کے مثر استعمال سمیت ماحولیاتی تحفظ کے قومی اہداف کے حصول میں مدد ملے گی۔انہوں نے جدید ٹیکنالوجی کے فروغ اور معیشت کے ابھرتے ہوئے شعبوں میں سرمایہ کاری کے لیے سرکاری اور نجی شعبے کے درمیان تعاون کی اہمیت پر زور دیا۔وفاقی وزیر نے کہا کہ پاکستان کو ایسی جدید شراکت داریوں کی ضرورت ہے جو تکنیکی ترقی کو عوام کے لیے عملی سہولیات میں تبدیل کر سکیں۔ الیکٹرک گاڑیوں کے چارجنگ نیٹ ورک کی توسیع نہ صرف صارفین کے لیے آسانیاں پیدا کرے گی بلکہ پائیدار ترقی کے منصوبوں میں نجی شعبے کی سرمایہ کاری اور شرکت کی بھی حوصلہ افزائی کرے گی۔رانا تنویر حسین نے مزید کہا کہ معاشی ترقی اور ماحولیاتی تحفظ کو ساتھ لے کر چلنا وقت کی اہم ضرورت ہے۔ صاف اور ماحول دوست ٹرانسپورٹ کے فروغ سے فضائی آلودگی اور کاربن کے اخراج میں کمی لانے کے ساتھ قومی معیشت کو زیادہ مستحکم اور پائیدار بنانے میں بھی مدد مل سکتی ہے۔وفاقی وزیر نے اسٹار چارج اور میکڈونلڈز پاکستان کی جانب سے گرین انفراسٹرکچر میں سرمایہ کاری کے امکانات تلاش کرنے کے عزم کو سراہتے ہوئے امید ظاہر کی کہ یہ تعاون دیگر کاروباری اداروں کو بھی ماحول دوست منصوبوں میں سرمایہ کاری اور اسی نوعیت کے اقدامات اختیار کرنے کی ترغیب دے گا۔اسٹار چارج اور میکڈونلڈز پاکستان کے درمیان یہ معاہدہ الیکٹرک گاڑیوں کے فروغ، چارجنگ انفراسٹرکچر کی مضبوطی اور صاف، سرسبز اور پائیدار مستقبل کے لیے حکومتِ پاکستان کی کوششوں میں نجی شعبے کے بڑھتے ہوئے کردار کی عکاسی کرتا ہے۔
