اسلام آباد (آئی پی ایس )ایتھوپیا کے پاکستان میں سفیر ڈاکٹر عمر حسین اوبا نے منگل کے روز اسلام آباد میں ایوانِ صدر میں منعقدہ ایک باضابطہ تقریب کے دوران اسلامی جمہوریہ پاکستان کے صدر آصف علی زرداری کو اپنی اسنادِ سفارت پیش کیں۔تقریب کے بعد صدرِ مملکت نے سفیر کے ساتھ ملاقات کی، جس میں پاکستان اور ایتھوپیا کے مابین تعلقات کے تمام پہلووں کا جائزہ لیا گیا۔
ملاقات کے دوران دونوں جانب سے دوطرفہ اور کثیرالجہتی سطح پر تعاون کو مزید گہرا کرنے کے مشترکہ عزم کا اعادہ کیا گیا۔گفتگو میں موسمیاتی تبدیلی، ہوا بازی، زراعت اور تجارت جیسے اہم شعبوں میں موجود وسیع مواقع کو بروئے کار لا کر دوطرفہ تعلقات کو مزید مضبوط بنانے پر توجہ مرکوز کی گئی۔اس موقع پر سفیر ڈاکٹر عمر نے ایتھوپیا کے صدر تائے اتسکے سلاسی اور وزیر اعظم ابی احمد علی کی جانب سے صدرِ پاکستان اور عوامِ پاکستان کے لیے نیک تمناں اور گرمجوش پیغامات پہنچائے۔ملاقات کے دوران سفیر نے پاکستان کی “لک افریقہ اور انگیج افریقہ” پالیسیوں اور مشرقی افریقی ممالک بشمول ایتھوپیا کے ساتھ تعلقات کو فروغ دینے کے عزم کو سراہا۔
صدر آصف علی زرداری نے بھی ایتھوپیا کی قیادت کے لیے نیک خواہشات کا اظہار کیا۔صدر نے ایتھوپیا کے ساتھ سفارتی اور اقتصادی تعلقات کو مزید وسعت دینے کی پاکستان کی خواہش کا اعادہ کیا۔سفیر ڈاکٹر عمر نے اسلام آباد میں اپنی ذمہ داریوں کے دوران حکومتِ پاکستان کے ساتھ قریبی تعاون جاری رکھتے ہوئے ایک مضبوط اور باہمی طور پر مفید شراکت داری کو فروغ دینے کے عزم کا اظہار کیا۔
