جدہ(خالد نواز چیمہ)مملکت سعودی عرب میں 299 ویں یومِ تاسیس کی شاندار تقریبات کا آغاز ہو گیا ہے، جہاں دارالحکومت ریاض سمیت مختلف شہروں کی بلند و بالا عمارتوں کو قومی رنگوں اور روشنیوں سے سجا دیا گیا ہے، جبکہ شہری تین صدیوں پر محیط پہلی سعودی ریاست کے قیام کا جشن جوش و خروش سے منا رہے ہیں۔ اس موقع پر خادم الحرمین الشریفین سلمان بن عبدالعزیز کی منظوری سے سرکاری تعطیل بھی دی گئی اور مختلف ثقافتی پروگراموں اور ملی نغموں کا اہتمام کیا گیا۔
اسی سلسلے میں جدہ میں پاکستان جرنلسٹ فورم کے زیرِ اہتمام “یومِ تاسیسِ سعودی عرب اور ویژن 2030: تاریخ، شناخت اور روشن مستقبل” کے عنوان سے ایک آن لائن اجلاس منعقد ہوا۔ پاکستان جرنلسٹس فورم کے چیئرمین امیر محمد خان اوورسیز پاکستانیز گلوبل فاؤنڈیشن سعودی عرب کے صدر خالد نواز چیمہ جنرل سیکرٹری جمیل راٹھور صدر معروف حسین زکیر بھٹی جاوید راہو نے سعودی قیادت، خصوصاً ولی عہد محمد بن سلمان کی قیادت اور Saudi Vision 2030 کو مملکت کی ترقی اور روشن مستقبل کی ضمانت قرار دیا۔اجلاس میں کہا گیا کہ یومِ تاسیس 1727ء میں محمد بن سعودکی جانب سے ریاض میں رکھی گئی پہلی سعودی ریاست کی بنیاد کی یاد دلاتا ہے، جو آج ایک مضبوط اور ترقی یافتہ مملکت کی صورت میں دنیا کے سامنے موجود ہے۔مقررین نے اس موقع پر کہا کہ سعودی عرب میں مقیم پاکستانی اوورسیز کمیونٹی مملکت سے گہری محبت اور عقیدت رکھتی ہے اور یومِ تاسیس کی خوشیوں میں برابر کی شریک ہے۔ انہوں نے کہا کہ پاکستانی کمیونٹی سعودی عرب کی ترقی کو اپنی ترقی سمجھتی ہے اور دونوں برادر ممالک کے مضبوط تعلقات پر فخر کرتی ہے۔اجلاس کے اختتام پر شرکاء نے سعودی عرب کی مزید ترقی، خوشحالی اور پاک سعودی تعلقات کی مضبوطی کے لیے خصوصی دعا کی۔
