اسلام آباد (سب نیوز) سپریم کورٹ کے چیف جسٹس پاکستان کے جہیز اور حق مہر کیسز میں ریمارکس دیتے ہوئے کہا ہے حق مہر میں لکھی چیزوں کا شوہر ادا کرنے کا پابند ہے،شادی کے وقت نکاح نامے کے تحت حق مہر کی ادائیگی لازم ہے۔بیگم کو مطمئن کرنا شوہر کی ذمہ داری ہے اور عدالت ایسے معاملات میں مداخلت نہیں کر سکتی۔
سپریم کورٹ میں جہیز اور حق مہر سے متعلق کیسز کی سماعت کے دوران چیف جسٹس پاکستان نے اہم ریمارکس دے دیے۔چیف جسٹس نے قرار دیا کہ حق مہر میں جو چیزیں لکھی ہوں، شوہر ان کی ادائیگی کا پابند ہے، عورت کے ساتھ جب شادی کی جاتی ہے تو نکاح نامے کے تحت درج ادائیگی لازم ہوتی ہے۔درخواستوں کی سماعت چیف جسٹس پاکستان یحییٰ آفریدی کی سربراہی میں سپریم کورٹ کے 2رکنی بینچ نے کی۔سماعت کے دوران وکیلِ درخواست گزار نے موقف اختیار کیا کہ حق مہر میں 40تولہ بہت زیادہ ہے اور شوہر 20تولہ ادا کرنے کو تیار ہے، اس پر چیف جسٹس پاکستان نے ریمارکس دیے کہ تھوڑا اور دے دیں تو معاملہ ٹھیک ہو جائے گا تاہم عدالت ایسے معاملات میں مداخلت نہیں کر سکتی۔بعد ازاں سپریم کورٹ نے جہیز اور حق مہر سے متعلق دائر مختلف درخواستیں خارج کر دیں۔
