اسلام آباد:(سب نیوز )؛نائب وزیرِ اعظم اور وزیرِ خارجہ سینیٹر محمد اسحاق ڈار نے یومِ پیدائش بانیٔ پاکستان قائدِ اعظم محمد علی جناحؒ اور کرسمس 2025 کے موقع پر اپنے پیغام میں کہا ہے کہ آج کا دن پاکستان کے قیام کے اس جامع وژن اور اخلاقی بنیادوں کی یاد دہانی ہے جن پر یہ ملک قائم ہوا۔.
انہوں نے کہا کہ قائدِ اعظم محمد علی جناحؒ نہ صرف آزادی کے معمار تھے بلکہ اصولوں کی پاسداری، غیر معمولی بصیرت اور جمہوری اقدار کے علمبردار بھی تھے۔ قائدِ اعظمؒ نے پاکستان کو ایک ایسی جمہوری ریاست کے طور پر دیکھا جہاں مساوات، تکثیریت اور تمام شہریوں کے بنیادی حقوق کا بلاامتیاز احترام کیا جائے۔ 11 اگست 1947 کی تاریخی تقریر کا حوالہ دیتے ہوئے اسحاق ڈار نے کہا کہ ریاست کسی شہری کے درمیان مذہب، رنگ یا نسل کی بنیاد پر کوئی امتیاز نہیں برتے گی۔
نائب وزیرِ اعظم نے اپنے پیغام میں مسیحی ہم وطنوں کو کرسمس کی دلی مبارکباد پیش کرتے ہوئے کہا کہ مذہبی آزادی، مساوات اور تکثیریت کا تحفظ ہمارے آئین اور قومی تشخص کا بنیادی ستون ہے۔ انہوں نے اس امر کا اعتراف کیا کہ مسیحی برادری نے تعلیم، صحت، عوامی خدمت اور قومی دفاع سمیت مختلف شعبوں میں پاکستان کی تعمیر و ترقی میں گراں قدر خدمات انجام دی ہیں۔
اسحاق ڈار نے کہا کہ کرسمس امن، ہمدردی، قربانی اور انسانیت سے محبت جیسی آفاقی اقدار کی علامت ہے، جو اسلامی تعلیمات اور قائدِ اعظم کے تصورِ پاکستان سے مکمل طور پر ہم آہنگ ہیں۔ انہوں نے مزید کہا کہ موجودہ عالمی حالات میں، جہاں دنیا عدم برداشت اور تقسیم جیسے چیلنجز سے دوچار ہے، پاکستان تکثیریت، بین المذاہب ہم آہنگی اور پُرامن بقائے باہمی کے اپنے عزم کا اعادہ کرتا ہے۔
پیغام کے اختتام پر نائب وزیرِ اعظم نے قائدِ اعظم محمد علی جناحؒ کے ورثے کو خراجِ عقیدت پیش کرتے ہوئے دنیا بھر کی مسیحی برادری کو ایک مرتبہ پھر کرسمس کی مبارکباد دی اور کہا کہ بھائی چارہ، باہمی احترام اور امن ہی پاکستان کی اصل طاقت اور فخر ہیں۔
پاکستان زندہ باد۔
