پاکستانی 80ہونہار طلبا کو سعودی عرب میں ملازمت دیدی گئی، ماہانہ کتنے کمائیں گے، تفصیلات سب نیوز پر

لاہور(آئی پی ایس )80پاکستانی طلبا کو سعودی عرب میں ملازمت دے دی گئی، طلبا ماہانہ 1600سے 1800ریال تک کمائیں گے، صوبائی وزیر ملک صہیب نے جاب لیٹرز تقسیم کردیے۔
تفصیلات کے مطابق طلبا کو جاب آفر لیٹرز دینے کی تقریب جی سی ٹی ریلوے روڈ میں منعقد ہوئی، صوبائی وزیر مواصلات ملک صہیب احمد بھرت بطور مہمان خصوصی شریک ہوئے۔ تقریب میں سیکریٹری اسکل ڈویلپمنٹ نادر چھٹہ اور سی او او ٹیوٹا فیصل فرید نے بھی شرکت کی۔ ٹیوٹا کے دیگر افسران میں اختر عباس بھروانہ، عامر عزیز، معاذ سلیم، عظمی نادیہ شریک تھے۔صوبائی وزیر ملک صہیب احمد بھرت نے طلبا میں بیرون ملک کام کرنے کے لیے جاب لیٹرز بھی تقسیم کیے۔
سیکریٹری اسکلز ڈویلپمنٹ نادر چھٹہ نے کہا کہ 80 ہونہار اسٹوڈنٹ کو سعودی عرب میں ملازمت کے لیے چنا گیا ہے، یہ طلبہ فائر الارم ٹیکنیشن اور فائر پروٹیکشن ٹیکنیشن کے طور پر کام کریں گے، یہ طلبا ماہانہ 1600 سے 1800 ریال تک کمائیں گے، مذکورہ طلبا کو دو ماہ میں ٹیکنیکل، سافٹ اسکلز اور پری ڈیپارچر ٹریننگ بھی دی گئی، ٹیوٹا اپنے طلبا کو بیرون ملک میں ملازمت کی فراہمی کے لئے تمام وسائل بروئے کار لا رہا ہے۔
وزیر مواصلات ملک صہیب احمد بھرت نے کہا کہ بیرون ملک جانے والے طلبا محنت کرکے ملک کا نام روشن کریں، پنجاب حکومت نے ڈیڑھ سال میں 20 ہزار کلومیٹر سٹرکوں کا جال بچھایا، وزیراعلی پنجاب نے 400 ارب روپے کی ای ٹینڈرنگ کی، محکمہ مواصلات نے ٹھیکیداروں کی اجارہ داری توڑ کر 70 ارب روپے بچت کی، وزیراعلی پنجاب نے صوبے بھر میں گورننس کو بہتر کیا ہے۔