منگل کے روز بھارتی ریاست اترپردیش سے خبر سامنے آئی تھی کہ ایک خاتون اپنے شوہر اور 6 بچوں کو چھوڑ کر ایک بھکاری کے ساتھ بھاگ نکلی لیکن اب اس کی اصل کہانی سامنے آگئی ہے۔
بھارتی میڈیا رپورٹس کے مطابق خاتون نے منظر عام پر آنے کےبعد پولیس میں اپنا بیان ریکارڈ کروایا ہے جس میں اپنے اوپر لگنے والے تمام الزامات مسترد کردیے۔
راجیشوری نے اپنے ابتدائی بیان میں بتایا کہ وہ بھکاری کے ساتھ فرار نہیں ہوئی بلکہ وہ اپنے کسی قریبی رشتے دار کے گھر ہے اور وہ اپنے شوہر کے ظلم و ستم سے تنگ آکر گھر سے بھاگی۔
خاتون نے بتایا کہ اس کا شوہر اسے مارتا پیٹتا تھا جس کی وجہ سے اس نے گھر سے بھاگنے کا سوچا۔
رپورٹس کے مطابق پولیس نے خاتون کے شوہر کے خلاف مقدمہ درج کرلیا اور تحقیقات کا بھی آغاز کردیا ہے۔
واضح رہے کہ 45 سالہ راجو نے کہا تھا کہ وہ ہرپال پور کے علاقے میں اپنی بیوی راجیشوری اور 6 بچوں کے ساتھ رہتا ہے، 45 سالہ ننھا پنڈت نامی شخص کبھی کبھی محلے میں بھیک مانگنے آتا تھا اور میری بیوی سے بات کرتا تھا، بعدازاں دونوں کی فون پر بھی بات شروع ہوگئی۔
متاثرہ شخص نے کہا کہ 3 جنوری کو دوپہر 2 بجے کے قریب میری بیوی راجیشوری نے ہماری بیٹی خوشبو کو بتایا کہ وہ کپڑے اور سبزی لینے بازار جا رہی ہے لیکن جب وہ واپس نہیں آئی تو میں نے اسے ہر جگہ تلاش کیا، وہ نہیں ملی۔
راجو کا کہنا ہے کہ میری بیوی گھر سے بھاگ گئی ہے، میں نے ایک بھینس بیچ کر جو رقم حاصل کی تھی وہ بھی بیوی ساتھ لے گئی، مجھے شک ہے کہ بھکاری میری بیوی کو اپنے ساتھ لے گیا ہے۔
