اسلام آباد،الیکشن کمیشن نے مسلم لیگ (ن)کی درخواست منظور کرتے ہوئے این اے 249 کراچی میں دوبارہ گنتی کا حکم دے دیا۔ ن لیگ کے مفتاح اسماعیل کی درخواست پر الیکشن کمیشن نے سماعت کی۔ مسلم لیگ (ن)نے بغیر دستخط شدہ فارم 45 کی تفصیلات الیکشن کمیشن میں جمع کرائیں۔وکیل ن لیگ نے موقف اپنایا کہ دوبارہ پولنگ کیلئے الگ درخواست دائر کریں گے، ووٹوں کی دوبارہ گنتی ہمارا پہلا مطالبہ ہے، مطمئن نہ ہوئے تو دوبارہ گنتی سے آگے بھی مطالبہ کرسکتے ہیں، حتمی نتائج سے پہلے الیکشن کمیشن دوبارہ گنتی کا حکم دے سکتا ہے، تصدیق شدہ فارم 45 اور 46 نہ ہونے سے الیکشن مشکوک ہوگیا۔ 167 سٹیشنز کے فارم 45 پر دستخط نہیں، پولنگ ایجنٹس کو فارم 46 بھی نہیں ملے۔پیپلزپارٹی کے وکیل لطیف کھوسہ نے کہا کہ ن لیگ نے فارم 45 پر اعتراض رات ڈھائی بجے ہارنے کے بعد کیا، ٹھوس وجوہات نہ ہونے پر الیکشن کمیشن بھی دوبارہ گنتی کا حکم نہیں دے سکتا، ریٹرننگ افسر نے قرار دیا کہ ن لیگ کی درخواست غیر مناسب ہے۔الیکشن کمیشن کے حکم کے مطابق 6مئی کو صبح 9بجے ووٹوں کی دوبارہ گنتی ہوگی ، مقررہ تاریخ کو صبح 9 بجے دوبارہ گنتی کے لیئے پہنچ جائیں۔
الیکشن کمیشن نے این اے 249 کراچی میں ووٹوں کی دوبارہ گنتی کا فیصلہ سنا دیا
روزانہ مستند اور خصوصی خبریں حاصل کرنے کے لیے ڈیلی سب نیوز "آفیشل واٹس ایپ چینل" کو فالو کریں۔
