بیجنگ :گنی کے وزیر اعظم امادو اوری باہ نے حال ہی میں دالیان میں منعقدہ 2026 سمر ڈیووس فورم میں شرکت کے دوران چائنا میڈیا گروپ کو ایک خصوصی انٹرویو دیا۔ ان کا کہنا تھا کہ گزشتہ چالیس برس کے دوران چین دنیا کے لئے ترقی کی ایک مثال بن چکا ہے، جس نے یہ ثابت کیا ہے کہ ایک ملک کس طرح غربت اور پسماندگی سے نکل کر بین الاقوامی سطح پر قیادت کے مقام تک پہنچ سکتا ہے۔ انہوں نے کہا کہ ہمیں چین کے ترقیاتی تجربات سے ضرور استفادہ کرنا چاہیے۔
رواں سال یکم مئی سے، چین نے سفارتی تعلقات رکھنے والے تمام 53 افریقی ممالک کے لیے مکمل طور پر صفر ٹیرف پالیسی نافذ کر دی ہے۔امادو اوری باہ کے خیال میں افریقی ممالک کو اس موقع سے فائدہ اٹھانا چاہیئے تاکہ وہ اپنی اقتصادی ترقی کی ضروریات کو پورا کر سکیں۔انہوں نے مزید کہا کہ دونوں فریقوں کی تجارتی مصنوعات کا جامع جائزہ لیا جائے گا تاکہ تعاون کے نئے امکانات تلاش کیے جا سکیں اور باہمی فائدے کی بنیاد پر نتائج حاصل ہوں۔
امادو اوری باہ نے کہا کہ چین نے صرف چالیس برس میں ایک نسبتاً پسماندہ ترقی پذیر ملک سے دنیا کی سب سے اہم اقتصادی طاقتوں میں سے ایک بننے تک کا سفر طے کیا ہے۔ انسانی تاریخ میں اس طرح کی غیر معمولی اور تیز تبدیلی بہت نایاب ہے۔ لہذا، ہم دل کی گہرائیوں سے چین کی اس شاندار کامیابی کا احترام رکھتے ہیں۔ انٹرویو میں وزیر اعظم امادو اوری باہ نے بتایا کہ سمر ڈیووس فورم جیسے پلیٹ فارم کے ذریعے، گنی چین کے تجربات سے استفادہ کر سکتا ہے۔ اُن کا کہنا تھا کہ چینی حکومت کے پیش کردہ “بیلٹ اینڈ روڈ” انیشی ایٹو نے دونوں ممالک اور حتیٰ کہ چین-افریقہ تعاون کے لیے نئے ترقیاتی مواقع پیدا کیے ہیں۔ دونوں ممالک کے درمیان اسٹریٹجک ہم آہنگی میں بہت سےامکانات موجود ہیں۔ چین اور گنی نہ صرف ایک دوسرے کے مددگار بھائی ہیں بلکہ ترقی اور خوشحالی کے راستے میں ایک دوسرے کے شراکت دار بھی ہیں۔
