اسلام آباد ہائیکورٹ: مشرف رسول تنازعہ کیس میں ڈی آئی جی انوسٹی گیشن طلب

اسلام آباد(سب نیوز) سابق سی ای او پی آئی اے مشرف رسول کا شہری وقاص احمد، سہیل علیم کے ساتھ لین دین کا تنازعہ ،وقاص احمد اور سہیل علیم کیخلاف درج مقدمہ خارج کرنے کی درخواست پر اسلام آبادہائیکورٹ میں سماعت ہوئی جس میں لاہور اور بہاولپور سے متعلق مقدمات شامل ہیں۔
عدالت نے ڈی آئی جی انوسٹی گیشن اسلام آباد کو آئندہ سماعت پر طلب کر لیا ہے۔
عدالت نے پوچھا کہ کیا لاہور پولیس کا بیان قلمبند کیا گیا ہے اور جنہوں نے خاتون کے گھر چھاپہ مارا، کیا ان کا بیان بھی لیا گیا؟
جسٹس محسن اختر کیانی نے استفسار کیا کہ کیا ان کے پاس سرچ وارنٹ موجود تھے جب خاتون اور بچیوں کو اٹھایا گیا۔
سماعت کے دوران لطیف کھوسہ نے مشرف رسول کی طاقتور حیثیت کا ذکر کیا اور ایک تصویر عدالت میں پیش کی جس میں مشرف رسول جوڈیشل ریفارمز کی میٹنگ میں موجود ہیں۔
وکیل شہریار طارق نے بتایا کہ سپریم کورٹ نے اس عدالت کا اکتوبر کا ایک آرڈر معطل کر رکھا ہے۔
جسٹس محسن اختر کیانی نے کہا کہ عدالت کو کام سے روک نہیں سکتے اور اگر بغیر سرچ وارنٹ کے کسی کو اٹھایا جائے تو وہ اغوا سمجھا جائے گا۔پولیس کی عدم کارروائی پر جسٹس محسن اختر کیانی نے افسوس کا اظہار کیا اور کہا کہ تین سال کی بچی کو چھ دن ماں سے دور رکھا گیا، جو انتہائی شرمناک عمل ہے۔
عدالت نے سماعت کو نو دسمبر تک ملتوی کرتے ہوئے ڈی آئی جی کو طلب کیا ہے تاکہ اس معاملے کی مزید تحقیقات کی جا سکیں۔