لاہور(آئی پی ایس) آل روانڈر اور پاکستان سپر لیگ 10کے ہیرو سکندر رضا زمبابوے میں نسلی تعصب کا شکارہوگئے ،انھوں نے ہرارے میٹروپولیٹن کرکٹ ایسوسی ایشن کو تحریری شکایت درج کرائی جس میں ایک مقامی کوچ بلیسنگ مافووا پر نسل پرستانہ رویہ اختیار کرنے کا الزام عائد کیا۔یہ واقعہ یکم جون کو وگنے کپ کے ایک میچ کے دوران پیش آیا، سکندر اولڈ ہراریئنز کی نمائندگی کرتے ہوئے رینبو کرکٹ کلب کے خلاف میدان میں اترے تھے۔ذرائع کے مطابق سکندر رضا نے اپنی شکایت میں دعوی کیا کہ میچ کے دوران جب وہ میدان سے باہر جا رہے تھے تو مخالف ٹیم کے کوچ بلیسنگ مافووا نے نسلی تعصب پر مبنی توہین آمیز الفاظ استعمال کیے۔
اگرچہ سکندر نے اپنی شکایت میں کسی کا نام نہیں لیا تاہم ایچ ایم سی اے کے چیئرمین تفاذوا مادورو نیواضح کیا کہ الزامات بلیسنگ مافووا کے خلاف ہیں،انھوں نے کہا کہ ہمیں گذشتہ ہفتے اطلاع ملی کہ ٹوئنٹی20 کپتان سکندر رضا کو نسلی تعصب کا سامنا کرنا پڑا ہے۔ہمیں معاملے کی ابتدائی رپورٹ موصول ہو گئی،منگل کو بلیسنگ مافووا سے سماعت میں الزامات پر وضاحت طلب کی جائے گی،
عبوری طور پر انھیں ایچ ایم سی اے کی کی تمام سرگرمیوں سے معطل کر دیا گیا ہے۔ انھوں نے کہا کہ ہم نسل پرستی جیسے سنگین الزامات کو انتہائی سنجیدگی سے لیتے ہیں اور اسے کسی صورت برداشت نہیں کرتے، معاملے کی مکمل اور شفاف تحقیقات ہوں گی۔
دوسری جانب سکندر رضا نے کہا کہ میں چاہتا ہوں معاملے کی مکمل تفتیش کی جائے، اگر الزامات درست ثابت ہوں تو سخت کارروائی ہونی چاہیے تاکہ موجودہ اور آئندہ نسلوں کے لیے یہ ایک سبق بن جائے، ایسے رویے کی کوئی گنجائش نہیں ہونی چاہیے۔یاد رہے کہ سکندر رضا حال ہی میں پاکستان سپر لیگ 2025 کے فائنل میں لاہور قلندرز کی نمائندگی کرتے ہوئے فیصلہ کن لمحات میں فاتحانہ رنز بنا کر ٹیم کو ٹائٹل جتوانے میں کلیدی کردار ادا کر چکے ہیں۔
