لاہور (سب نیوز )واہگہ بارڈر پر پرچم اتارنے کی ولولہ انگیز تقریب میں عوام کی بڑی تعداد نے شرکت کی۔ تقریب کا آغاز قومی ترانے سے ہوا، جبکہ شرکا ہاتھوں میں قومی پرچم تھامے فلک شگاف نعرے لگاتے رہے۔ پنجاب رینجرز کی پریڈ، بالخصوص خواتین اہلکاروں کی شرکت نے شرکا کے جذبے کو دوچند کر دیا۔ فضا پاکستان زندہ باد اور پاک فوج زندہ باد کے نعروں سے گونجتی رہی۔
واہگہ بارڈر پر پرچم اتارنے کی روایتی تقریب میں وطن سے محبت اور افواجِ پاکستان سے یکجہتی کا فقیدالمثال مظاہرہ دیکھنے میں آیا۔ ہزاروں افراد پر مشتمل عوام کی بڑی تعداد نے شرکت کر کے دشمن کو واضح پیغام دیا کہ قوم متحد ہے اور پاک فوج کے شانہ بشانہ کھڑی ہے۔
تقریب کا آغاز قومی ترانے سے ہوا جس کے ساتھ ہی فضا میں ملی نغمے گونجنے لگے۔ شرکا نے ہاتھوں میں قومی پرچم تھامے نعر تکبیر، پاکستان زندہ باد اور پاک فوج زندہ باد کے فلک شگاف نعرے لگا کر ماحول کو وطن پرستی سے بھر دیا۔
پنجاب رینجرز کے ولولہ انگیز مارچ پاسٹ نے شرکا کا لہو گرما دیا، خاص طور پر رینجرز کی خواتین اہلکاروں کی شرکت نے تقریب کو مزید پرجوش بنا دیا۔ عوام، خصوصا نوجوانوں، بچوں، بزرگوں اور خواتین نے اپنی افواج کے حوصلے بلند کرنے کے لیے مسلسل تالیاں اور نعرے لگائے۔
حالیہ دنوں میں پہلگام فالس فلیگ اور بھارت کی جھوٹی سرجیکل اسٹرائیک کے دعوں کے پس منظر میں یہ عوامی اجتماع نہ صرف حب الوطنی کا اظہار تھا بلکہ دشمن کو یہ دوٹوک پیغام بھی دیا گیا کہ پاکستانی قوم ہر محاذ پر اپنی افواج کے ساتھ کھڑی ہے۔
