جعفر ایکسپریس حملے پر پوری قوم صدمے میں ہے، وزیراعظم کا وزیراعلی بلوچستان سے رابطہ

اسلام آباد(سب نیوز)وزیراعظم شہباز شریف نے کہا ہے کہ جعفر ایکسپریس پر دہشت گردوں کے حملے پر پوری قوم شدید صدمے میں ہے اور اس حوالے سے وزیراعلی بلوچستان سے بات کی ہے۔
سماجی رابطے کی ویب سائٹ ایکس پر جعفر ایکسپریس کے حوالے سے پیغام میں وزیراعظم شہباز شریف نے کہا کہ ابھی میری وزیراعلی بلوچستان سرفراز بگٹی سے ٹیلی فون پر بات ہوئی ہے۔انہوں نے بتایا کہ وزیراعلی بلوچستان نے مجھے جعفر ایکسپریس پر ہونے والے دہشت گردی کے گھنانے حملے کے تازہ ترین حالات سے آگاہ کیا۔
وزیراعظم نے کہا کہ پوری قوم اس گھناونے فعل سے شدید صدمے میں ہے اور معصوم جانوں کے ضیاع پر غم زدہ ہے، ایسی بزدلانہ کارروائیاں پاکستان کے امن کے عزم کو متزلزل نہیں کر سکتیں۔وزیراعظم نے کہا کہ میں شہدا کے اہل خانہ سے دلی تعزیت کرتا ہوں، اللہ تعالی ان کو جنت الفردوس میں اعلی مقام اور زخمیوں کو جلد صحت یاب فرمائے۔انہوں نے کہا کہ آپریشن کے دوران درجنوں دہشت گردوں کو جہنم واصل کر دیا گیا ہے۔