عام انتخابات 2024میں ریکارڈ تعداد میں پاکستانیوں نے ووٹ ڈالا، رپورٹ جاری

اسلام آباد (آئی پی ایس )فری اینڈ فیئر الیکشن نیٹ ورک (فافن)نے انتخابات میں ووٹرزکی شمولیت کی جائزہ رپورٹ جاری کردی۔
فافن رپورٹ کے مطابق عام انتخابات 2024میں رکارڈ پاکستانیوں نے ووٹ ڈالا، انتخابات میں 6 کروڑ 12 لاکھ 82 ہزار 920 ووٹرز نے ووٹ ڈالا اور ووٹر ٹرن آوٹ48فیصد رہا جو 2018میں 52فیصد تھا۔
رپورٹ میں کہا گیا ہے کہ 2018 سے 2024 کے دوران 2 کروڑ 25 لاکھ ووٹرز کا اضافہ ہوا، 2024 انتخابات کیلئے خواتین ووٹرزکی رجسٹریشن نے مردوں کو پیچھے چھوڑدیا۔ ایک کروڑ مردوں کے مقابلے میں ایک کروڑ 25 لاکھ خواتین ووٹر رجسٹرہوئیں۔ مرد اور خواتین ووٹرز ٹرن آوٹ کا 2018 میں فرق10 فیصد تھا جوکم ہوکر9 فیصد ہوا۔
رپورٹ کے مطابق شہری علاقوں کے مقابلے میں دیہی علاقوں میں ووٹر ٹرن آوٹ زیادہ رہا، دیہی علاقوں میں ووٹر ٹرن آوٹ 50فیصد اورشہری علاقوں میں 43.8 فیصد رہا۔خیال رہے کہ ملک میں عام انتخابات رواں سال 8 فروری کو ہوئے تھے اور قومی اسمبلی سمیت چاروں صوبائی اسمبلیوں کیلئے ووٹرز نے حق رائے دہی کا استعمال کیا تھا۔