عطاتارڑ کے پاس مرادسعید کی اطلاعات ہیں تو چھاپہ ماریں، ورنہ بیان نہ دیں،فیصل کریم کنڈی

پشاور (آئی پی ایس )گورنر کے پی فیصل کریم کنڈی نے کہا ہے کہ وفاقی وزیر عطاتارڑ کے پاس مرادسعید کی موجودگی کی اطلاعات ہیں تو ضرور چھاپہ ماریں، کیا وزیراعلی ہاوس میں دہشت گرد کو پناہ دینا ٹھیک ہے؟ مراد سعید کی سی ایم ہاوس میں اطلاعات ہیں تو چھاپہ ماریں ورنہ بیانات نہ دیں۔
میڈیا سے گفتگو میں انہوں نے کہا کہ کے پی میں امن وامان کیلئے کابینہ میں آج تک کوئی بات نہیں ہوئی، صوبائی حکومت نے کرم متاثرین کی کوئی امداد نہیں کی ،ہم 8ہزار خاندانوں کی مدد کر رہے ہیں، صوبائی حکومت کچھ نہیں کر رہی۔فیصل کنڈی نے کہا کہ امن کیلئے صوبائی حکومت اقدام نہیں کریگی تو لوگ ہم سے سوال کرتے ہیں، اے پی سی میں پی ٹی آئی کے علاوہ تمام سیاسی جماعتیں موجودتھیں، کانفرنس کے 14میں سے 11پوائنٹس صوبائی حکومت کے حق میں تھے۔
ان کا کہنا تھا کہ کے پی میں آگ بجھانے کے بجائے اسلام آباد میں آگ لگائی جارہی تھی وزیراعلی نے کہااین ایف سی کے تحت ایک فیصد حصہ ملنا تھاجو نہیں ملا، وزیراعلی کے ساتھ چیف سیکرٹری بھی تھے انہوں نے کہا ہمیں حصہ ملا ہے، بدمعاشی اور فلمی ڈائیلاگ سے پیسے نہیں ملیں گے بلکہ اسلام آباد میں بیٹھ کر دلائل اور دلیل سے بات کریں گے تو پیسے ملیں گے۔گورنر نے کہا کہ وزیراعلی کے پی ایپکس کمیٹی میں آنسو بہاتے ہیں اور باہر جاکر کیسٹ تبدیل کر دیتے ہیں وزیراعلی کے پی ایپکس کمیٹی میں اپنی مجبوریاں بتاتے رہے۔