اسلام آباد(آئی پی ایس )ملک میں مسلسل تیسرے روز کورونا کے 4 ہزار سے زائد مثبت کیسز سامنے آئے ہیں جب کہ مثبت کیسز کی شرح بھی 11 فیصد سے بڑھ گئی ہے۔ نیشنل کمانڈ اینڈ آپریشن سینٹر کی جانب سے جاری اعداد و شمار کے مطابق گزشتہ 24 گھنٹوں کے دوران ملک بھر میں کویڈ 19 کی تشخیص کے لیے 40 ہزار 369 ٹیسٹ کئے گئے۔ این سی او سی کے مطابق ملک میں کورونا کی مجموعی مثبت کیسز کی شرح 11 اعشاریہ 2 فیصد کی ریکارڈ بلند ترین سطح پر پہنچ گئی ہے۔ سوات میں کورونا مثبت کیسزکی شرح 23 فیصداور سب سے زیادہ کیسز رپورٹ ہوئے ہیں، اس کے علاوہ پشاور میں کورونا مثبت کیسز کی شرح 22 فیصد جب کہ مالاکنڈ، سرگودھا اور سیالکوٹ میں 12 فیصد مثبت کیسز رپورٹ ہوئے ہیں۔گزشتہ روز ملک بھر میں مسلسل تیسرے دن بھی 4 ہزار سے زائد افراد میں کورونا وائرس کی تشخیص ہوئی، 4525 افراد میں کورونا وائرس کی تصدیق کے بعد اب ملک میں کورونا کے مصدقہ مریضوں کی مجموعی تعداد 6 لاکھ 59 ہزار 116ہو گئی ہے۔ سرکاری اعداد و شمار کے مطابق پنجاب میں کورونا کے مصدقہ مریضوں کی تعداد 2 لاکھ 15 ہزار227 ہے، سندھ 2 لاکھ 64 ہزار 889، خیبر پختونخوا 85 ہزار 531، بلوچستان میں 19 ہزار 525، اسلام آباد میں 56 ہزار 450، آزاد کشمیر 12 ہزار 484 اور گلگت بلتستان میں 5 ہزار10 افراد کورونا سے متاثر ہوچکے ہیں۔ این سی او سی کے مطابق گزشتہ روز ملک بھر میں کورونا کے ہاتھوں مزید 41 افراد کی زندگیوں کے چراغ گل ہوگئے ، اس طرح اس وبا سے ہونے والی اموات کی مجموعی تعداد 14 ہزار 256 تک پہنچ گئی۔ کورونا کے سبب سب سے زیادہ اموات پنجاب میں ہوئی ہیں جہاں 6 ہزار246 افراد جان کی بازی ہار چکے ہیں جب کہ سندھ میں 4 ہزار 491، خیبر پختونخوا 2 ہزار301، اسلام آباد 561، گلگت بلتستان 103، بلوچستان میں 206 اور آزاد کشمیر میں 348 افراد جاں بحق ہوئے ہیں۔ 2 ہزار 268 مریضوں نے اس وبا کو شکست دے دی ہے، اس طرح اب تک 5 لاکھ 98 ہزار197 مصدقہ مریض کورونا سے صحت یاب ہوچکے ہیں۔ ملک بھر اس وقت کورونا کے فعال مریضوں کی تعداد 46 ہزار 663 ہیجن میں سے 3 ہزار 55 کی حالت تشویش ناک ہے۔
کورونا بے قابو؛ مثبت کیسز کی شرح 11 فیصد سے تجاوز، مزید 41 افراد جاں بحق
روزانہ مستند اور خصوصی خبریں حاصل کرنے کے لیے ڈیلی سب نیوز "آفیشل واٹس ایپ چینل" کو فالو کریں۔