تہران (سب نیوز)ایران کی پاسدارانِ انقلاب نے دعوی کیا ہے کہ اس نے بحرین میں امریکی فوج کے پیٹریاٹ فضائی دفاعی نظام کے 2 ریڈارز کو حملوں کا نشانہ بنایا ہے۔ایرانی خبر رساں ادارے تسنیم کے مطابق پاسدارانِ انقلاب کے شعبہ تعلقات عامہ نے اتوار 22 نومبر کو ایک بیان میں اس کارروائی کا اعلان کیا۔
رپورٹ کے مطابق پاسدارانِ انقلاب کا کہنا ہے کہ بحرین میں الرفاع اور عوالی کے فوجی اڈوں پر نصب امریکی پیٹریاٹ فضائی دفاعی نظام کے 2 ریڈارز کو نشانہ بنایا گیا۔ تاہم ایرانی دعوے کے حوالے سے حملے کی نوعیت، اس کے نتیجے میں ہونے والے نقصان یا کسی جانی نقصان کی تفصیلات سامنے نہیں آئیں۔دوسری جانب بحرین نے اپنی سرزمین پر ایران کے پاسدارانِ انقلاب کی جانب سے ڈرون حملوں کی مذمت کرتے ہوئے کہا ہے کہ ان حملوں میں ایک شہری تنصیب کو نشانہ بنایا گیا، جس کے نتیجے میں املاک کو نقصان پہنچا۔ بحرین نے ان حملوں کو اپنی خودمختاری اور سلامتی کے لیے خطرہ قرار دیا ہے۔
ادھر امریکی فوج نے بحرین میں اپنے فضائی دفاعی نظام کے ریڈارز پر ایرانی حملے کے دعوے کی تاحال نہ تصدیق کی ہے اور نہ ہی اس کی تردید کی ہے۔اس لیے امریکی تنصیبات کو پہنچنے والے نقصان اور ایرانی دعوے کی آزادانہ طور پر تصدیق نہیں ہو سکی۔یہ پیش رفت ایسے وقت میں سامنے آئی ہے جب بحرین میں امریکی فوجی تنصیبات اور خلیجی خطے کی سیکیورٹی سے متعلق صورتحال پر توجہ مرکوز ہے۔ تاہم دستیاب معلومات کی بنیاد پر یہ واضح نہیں کہ مبینہ حملے سے امریکی فضائی دفاعی نظام کی فعالیت متاثر ہوئی ہے یا نہیں۔
