دنیائے فٹ بال کا عظیم دور تمام،ارجنٹائن کے عظیم فٹ بالر لیونل میسی نے ریٹائرمنٹ کا اعلان کر دیا

دبئی (سب نیوز)ارجنٹائن کے عظیم فٹ بالر لیونل میسی نے قومی ٹیم کے لیے کھیلنے سے ریٹائرمنٹ کا اعلان کردیا ہے۔ میسی نے 2005 میں ارجنٹائن کی جانب سے بین الاقوامی کریئر شروع کیا اور 2022 میں ٹیم کو عالمی کپ جتوانے کے ساتھ دو مرتبہ کوپا امریکا کا اعزاز بھی حاصل کیا۔ارجنٹائن کے کپتان اور عظیم فٹ بالر لیونل میسی نے 207 بین الاقوامی میچ کھیلنے کے بعد قومی ٹیم سے ریٹائرمنٹ کا اعلان کردیا ہے۔
39 سالہ میسی نے اپنے بیان میں کہا کہ یہ فیصلہ ان کے لیے انتہائی تکلیف دہ تھا اور اب بھی دل کی گہرائیوں میں اس کا درد موجود ہے، تاہم وہ سمجھتے ہیں کہ ارجنٹائن کی قومی ٹیم کے ساتھ ان کا وقت اب ختم ہونے کا مرحلہ آ گیا ہے۔میسی نے کہا کہ انہوں نے قومی ٹیم کی شرٹ کے لیے ہمیشہ اپنی پوری توانائی صرف کی اور صرف کامیابیوں کے دور میں نہیں بل کہ اس سے پہلے کے مشکل وقت میں بھی ملک کے لیے سب کچھ میدان میں چھوڑا۔انہوں نے کہا کہ وقت تیزی سے گزر رہا ہے اور کچھ ابواب اپنے اختتام کو پہنچ جاتے ہیں۔ میسی کے مطابق وہ ہمیشہ ارجنٹائن کی قومی ٹیم کا حصہ رہنے کو پسند کرتے رہے ہیں اور اب نئی نسل کے باصلاحیت کھلاڑیوں کو آگے آنے کا موقع ملنا چاہیے۔
میسی نے بتایا کہ انہوں نے ریٹائرمنٹ کا فیصلہ 21 جولائی کو کیا تھا، جو 2026 کے عالمی کپ کے فائنل میں اسپین کے ہاتھوں ارجنٹائن کی شکست کے دو روز بعد کا وقت تھا۔ بعد ازاں رواں ماہ اپنے والد خورخے میسی کے انتقال نے بھی انہیں اس فیصلے کو حتمی شکل دینے پر آمادہ کیا۔میسی نے اپنے والد کی وفات کے بعد بھی اپنے بین الاقوامی مستقبل کے حوالے سے شکوک کا اظہار کیا تھا۔ انہوں نے 2026 کے عالمی کپ فائنل کا حوالہ دیتے ہوئے کہا تھا کہ وہ اپنی جسمانی حدود سے آگے جانے کی کوشش کر رہے تھے لیکن ان کی ٹانگوں نے مزید ساتھ نہیں دیا۔
میسی نے 2005 میں ارجنٹائن کی قومی ٹیم کے لیے ڈیبیو کیا تھا۔ وہ 2022 کے عالمی کپ میں ارجنٹائن کو عالمی چیمپئن بنوانے میں مرکزی کردار ادا کرچکے ہیں، جب کہ 2014 اور 2026 کے عالمی کپ فائنلز میں ٹیم رنر اپ رہی۔ انہوں نے ارجنٹائن کے ساتھ دو کوپا امریکا ٹائٹلز بھی جیتے۔قومی ٹیم سے ریٹائرمنٹ کے باوجود میسی کلب فٹ بال جاری رکھیں گے۔ وہ انٹر میامی سے وابستہ ہیں اور ان کا معاہدہ 2028 تک ہے۔