اسلام آباد(سب نیوز)علاقائی غیر یقینی صورتحال کے باوجود پاکستان کی ٹیکسٹائل برآمدات نے جولائی 2026 میں نئی بلند ترین سطح حاصل کر لی۔ برآمدات پہلی بار 1.833 ارب ڈالر تک پہنچ گئیں، جو جون کے مقابلے میں 43 فیصد اور گزشتہ سال کے اسی مہینے کے مقابلے میں 9.11 فیصد زیادہ ہیں۔
سرکاری اعداد و شمار کے مطابق جولائی 2026 کے دوران پاکستان کی ٹیکسٹائل برآمدات کی مجموعی مالیت 1.833 ارب ڈالر رہی، جو اس شعبے کی ماہانہ برآمدات کا نیا ریکارڈ ہے۔اس سے قبل جون 2026 میں ٹیکسٹائل برآمدات کا حجم 1.282 ارب ڈالر تھا۔ اس طرح صرف ایک ماہ میں برآمدات میں 43 فیصد کا نمایاں اضافہ ریکارڈ کیا گیا۔اسی طرح جولائی 2025 کے مقابلے میں بھی برآمدات میں 9.11 فیصد اضافہ دیکھنے میں آیا، جب ٹیکسٹائل برآمدات کا حجم 1.68 ارب ڈالر تھا۔
اعداد و شمار کے مطابق مالی سال 26-2025 کے دوران پاکستان کی مجموعی ٹیکسٹائل برآمدات 17.97 ارب ڈالررہیں، جو مالی سال 25-2024 کے 17.91 ارب ڈالر کے مقابلے میں 0.34 فیصد زیادہ ہیں۔اگرچہ سالانہ بنیاد پر مجموعی اضافہ محدود رہا، تاہم جولائی 2026 کی غیر معمولی کارکردگی نے اس شعبے کی برآمدی صلاحیت اور عالمی منڈی میں پاکستانی مصنوعات کی بڑھتی ہوئی طلب کا واضح اشارہ دیا ہے۔واضح رہے کہ ٹیکسٹائل پاکستان کا سب سے بڑا برآمدی شعبہ ہے اور ملکی زرمبادلہ کے ذخائر میں اس کا بنیادی کردار ہے۔
حالیہ مہینوں میں علاقائی کشیدگی، عالمی معاشی دبا اور تجارتی غیر یقینی صورتحال کے باوجود جولائی 2026 میں ریکارڈ برآمدات اس امر کی نشاندہی کرتی ہیں کہ پاکستانی ٹیکسٹائل صنعت عالمی منڈی میں اپنی مسابقت برقرار رکھنے میں کامیاب رہی ہے، جس سے آنے والے مہینوں میں برآمدات میں مزید بہتری کی توقع کی جا رہی ہے۔
مسائل کے باوجود ٹیکسٹائل صنعت کا نیا ریکارڈ، صرف ایک ماہ میں پاکستانی برآمدات 1.83ارب ڈالر سے تجاوز
روزانہ مستند اور خصوصی خبریں حاصل کرنے کے لیے ڈیلی سب نیوز "آفیشل واٹس ایپ چینل" کو فالو کریں۔
