اسلام آباد(آئی پی ایس )سابق سینیٹر کامران مائیکل، ایڈووکیٹ وحید جاوید (کوآرڈی نیٹر وزیرِاعظم یوتھ پروگرام پنجاب برائے اقلیتیں)کے ہمراہ اسفندیار بھنڈارا سے ملاقات کے لیے آئے اور انہیں وزیرِاعظم کی جانب سے قومی کمیشن برائے اقلیتی حقوق کے چیئرپرسن کی تقرری کیلئے قائم پارلیمانی کمیٹی کا رکن نامزد کیے جانے پر مبارکباد دی۔
ملاقات کے دوران اقلیتوں سے متعلق امور اور نئے کمیشن سے وابستہ توقعات پر مختصر تبادلہ خیال بھی کیا گیا۔علاوہ ازیں کیپٹن (ریٹائرڈ)بابر برنارڈ میسی، سیکریٹری جنرل پاتھ فائنڈر انٹر فیتھ ہارمونی انیشی ایٹو نے بھی اسفند یار بھنڈارا سے ملاقات کی اور انہیں مبارکباد پیش کی۔ اس ملاقات میں کمیونٹی سے متعلق امور اور اس بات کی اہمیت پر گفتگو ہوئی کہ قومی سطح پر فیصلہ سازی میں اقلیتوں کے نقطہ نظر کی موثر نمائندگی یقینی بنائی جائے۔
