اسلام آباد(سب نیوز)وفاقی جمہوریہ ایتھوپیا کے سفیرڈاکٹر عمر حسین اوبا نے اسلام آباد میں وزارتِ خارجہ کے ڈائریکٹر جنرل (اقوامِ متحدہ) عمر صدیق سے خیرسگالی ملاقات کی۔دونوں جانب سے اقوامِ متحدہ کے فریم ورک کے تحت دوطرفہ اور کثیرالجہتی تعاون کو مزید مضبوط بنانے کے مختلف امکانات پر تبادلہ خیال کیا گیا، تاکہ مشترکہ خوشحالی اور ترقی کے اہداف حاصل کیے جا سکیں۔
گفتگو میں اس امر کو اجاگر کیا گیا کہ ایتھوپیا اور پاکستان نے بین الاقوامی امن مشنز میں تاریخی کردار ادا کیا ہے، اور عالمی امن و سلامتی کے لیے اپنے مشترکہ عزم کا اعادہ کیا۔سفیر ڈاکٹر عمر حسین اوبا نے ڈائریکٹر جنرل کو کثیرالجہتی نظام کے احیا میں ایتھوپیا کے فعال کردار سے آگاہ کیا، اور اس بات پر روشنی ڈالی کہ حال ہی میں ادیس ابابا میں 39واں افریقی یونین سربراہی اجلاس اور دوسرا اٹلی۔افریقہ سربراہ اجلاس منعقد ہونا کس قدر اسٹریٹجک اہمیت کا حامل ہے۔انہوں نے اس بات پر زور دیا کہ سی او پی 32 کی میزبانی کے لیے ایتھوپیا کا انتخاب عالمی ماحولیاتی استحکام اور سبز ترقی کے ایجنڈے میں ملک کی بڑھتی ہوئی قیادت کا مظہر ہے۔سفیر نے ڈائریکٹر جنرل (اقوامِ متحدہ)کو علاقائی انضمام اور ہارن آف افریقہ میں امن و سلامتی کے قیام کے لیے ایتھوپیا کی کوششوں سے بھی آگاہ کیا۔ڈائریکٹر جنرل عمر صدیق نے عالمی جنوب میں پائیدار ترقی کے فروغ سمیت کثیرالجہتی اور سفارت کاری میں ایتھوپیا کے قائدانہ کردار کو سراہا۔
