اسلام آباد(سب نیوز) چیئرمین کیرئیر گروپ آف انسٹیٹیوشنز جاوید انتظار نے کہا کہ اللہ نے قرآن مجید میں کامیابی کا فارمولا دے رکھا ہے۔ جو قوت فیصلہ ، یقین اور کوشش کا باہمی اشتراک ہے۔جو انسان قوت فیصلہ اور اللہ پر یقین کیساتھ محنت کرتا ہے ۔
وہ ناکام ہو ہی نہیں سکتا۔ اسے کامیابی سے کوئی نہیں روک سکتا ۔ وہ بطور مہمان خصوصی نیشنل پولیس فاؤنڈیشن سکول دھمیال کیمپ راولپنڈی کی افتتاحی تقریب سے خطاب کر رہے تھے۔ تقریب میں سرکاری و نجی سیکٹر کے ماہرین تعلیم ، اساتذہ، طلباء اور والدین کی بڑی تعداد شریک تھی ۔ انہوں نے معروف ماہر تعلیم اور فیڈرل بورڈ کے سابق منتخب رکن بورڈ آف گورنر ( BOG) شاہد منصور کو نیشنل پولیس فاؤنڈیشن سکول دھمیال کیمپ راولپنڈی کی فرنچائز حاصل کرنے پر مبارکباد دیتے ہوئے کہا کہ انکی پیشہ تعلیمی خدمات کسی تعارف کی محتاج نہیں۔ اسلام آباد کیرئیر کالج کی 13برانچز اور کیرئیر اکیڈمیز کی 7 برانچز کام کر رہی ہیں۔ میرا ہدف ملک میں اسلام اباد کیریئر کالج کی 100 برانچز کا قیام عمل میں لانا ہے۔
جاوید انتظار نے کہا کہ والدین بچوں کی ترجیحات ترتیب دیں ۔ جس میں تین گھنٹے روزانہ مضامین کی پڑھائی ، دہرائی اور تیاری کا رکھیں۔ جس طالب علم کو اپنا کام روزانہ بیٹھ کر کرنے کی عادت ہو جائے وہ کامیاب ہو جاتا ہے۔ اس امر کی تکمیل میں والدین کا کردار فیصلہ کن ہے۔ انہوں نے امید ظاہر کی کہ شاہد منصور تین دہائیوں سے تعلیمی خدمات بطریق احسن سر انجام دیں گے ۔ سوچ دنیا کے ہر ہدف کو حاصل کرنے کی بنیاد ہے۔ انکی سٹیج آمد پر پھولوں کے گلدستے پیش کیے گئے۔
