جدہ (خالد نواز چیمہ)پاکستان کے نئے قونصل جنرل سید مصطفی ربانی نے کہا ہے کہ سعودی عرب میں مقیم پاکستانیوں کو معیاری قونصلی سہولیات کی فراہمی، سعودی قوانین اور اپنے حقوق سے مکمل آگاہی دینا ان کی اولین ترجیح ہے۔ انہوں نے واضح کیا کہ قونصلیٹ کو ایک شفاف، مثر اور عوام دوست ادارہ بنایا جائے گا، جس میں میڈیا کا کردار نہایت اہم ہے۔ یہ بات انہوں نے جدہ میں پاکستان جرنلسٹس فورم سے وابستہ صحافیوں سے تعارفی ملاقات کے دوران کہی۔ قونصل جنرل نے کہا کہ صحافی برادری کمیونٹی کے مسائل سے بخوبی آگاہ ہے اور ان کی مشاورت سے کم وقت میں بہتر اور مثبت نتائج حاصل کیے جا سکتے ہیں۔
انہوں نے بتایا کہ جدہ اور مغربی ریجن میں مقیم پاکستانیوں کو جلد ایک جدید، باوقار اور وسیع نئی قونصلیٹ عمارت فراہم کی جا رہی ہے، جس کی تکمیل سابقہ قونصل جنرل اور وزارتِ خارجہ و وزارتِ خزانہ کی کاوشوں کا نتیجہ ہے۔ نئی عمارت میں منتقلی کے باعث دو سرکاری تعطیلات سمیت مجموعی طور پر پانچ روز تک پاسپورٹ اور نادرا کی خدمات عارضی طور پر معطل رہیں گی،
تاہم ہنگامی سفری دستاویزات اور اموات کے سرٹیفکیٹس کی سہولت بدستور جاری رہے گی۔قونصل جنرل نے سعودی مارکیٹ میں پاکستانی مصنوعات، خصوصا آم اور کینو کے فروغ کے لیے عملی اقدامات کی یقین دہانی کراتے ہوئے کہا کہ آئندہ نمائشوں کا انعقاد فصلوں کے سیزن کو مدنظر رکھتے ہوئے کیا جائے گا۔ ملاقات خوشگوار ماحول میں اختتام پذیر ہوئی، جس میں باہمی تعاون، رابطوں کے فروغ اور پاکستانی کمیونٹی کی فلاح و بہبود کے لیے مشترکہ کوششوں پر اتفاق کیا گیا۔
