اسلام آباد (سب نیوز)الیکشن کمیشن نے آئندہ عام انتخابات میں جوڈیشل افسران کو بطورریٹرننگ افسران لگانے اور ہر حلقے کیلئے الگ ریٹرننگ افسر کی شرط ختم کرنے کی تجویز دے دی۔
الیکشن کمیشن نے ریٹرننگ افسران کی تعیناتی سے متعلق حکومت کو بھجوائی گئی سفارشات میں کہا ہے کہ وفاقی حکومت الیکشن ایکٹ میں ترمیم کرکے جوڈیشل افسران کی بطور آر او فراہمی یقینی بنائے۔الیکشن کمیشن سفارشات کے مطابق تمام ہائیکورٹس کو انتخابات کیلئے جوڈیشل افسران کی فراہمی کیلئے پابند کیا جائے، جوڈیشل افسران کو قانون اور انتخابی امور کی زیادہ آگاہی ہوتی ہے، گزشتہ انتخابات میں بیوروکریسی سے آئے افسران کی الیکشن ڈیوٹی کیلئے دستیابی مشکل رہی۔
الیکشن کمیشن نے ہر حلقے کیلئے الگ ریٹرننگ افسر کی شرط ختم کرنے کی بھی تجویز دیدی، کہا ہر حلقہ کیلئے الگ ریٹرننگ افسران کی تعیناتیوں سے مسائل پیدا ہوئے، قومی اسمبلی کے نیچے متعلقہ صوبائی اسمبلی کے حلقوں کیلئے ایک ہی آر او کی اجازت ہونی چاہیے، الیکشن کمیشن نے ریٹرننگ افسران کی تعیناتی سے متعلق سفارشات حکومت کو بھجوا دیں۔
